د هسپانیا او انګلستان (انګلینډ) د فوټبال ملي لوبډلې د اروپا جام په پایلوبه کې یو بل ته مخامخېږي.
د جرمني د پلازمېنې برلېن په لوبغالي کې د جولای ۱۴مې سیالي د پېښور پر وخت د شپې پر ۱۲ او د کابل پر ۱۱ نیمو بجو پیلېږي.
انګلستان د جولای پر ۱۰مه نېدرلینډز (هالینډ) او هسپانیا د جولای پر نهمه فرانسې ته په ماتې ورکولو پایلوبو ته ورسېدل. د اروپايي جام سیالۍ له ۱۹۶۰ز لسیزې راهیسې هر څلور کاله وروسته کېږي چې پکې د اروپايي هېوادونو ملي لوبډلې برخه اخلي.
د اروپايي جام سیالۍ په ۲۰۲۰ز کال کې د کورونا وایرس جهاني وبا له وجې ځنډېدلې وې او د ۲۰۲۱ز کال په اوړي کې وشوې چې پایلوبه یې اېټالیا وګټله.
