د بنګلادېش پوځ زده کوونکو د لاریونونو مخنیوي لپاره په پلازمینه ډاکه کې کرفیو یا ګرځبندیز عملي کړی دی.
دا په داسې حال کې ده چې له تېرو پینځه ورځو راهیسې د ډاکې په ګډون د بنګلادېش په لویو ښارونو کې زده کوونکي سړکونو ته راوتلي دي او د سرکاري نوکریو د کوټې یا پکې د برخې ځانګړي کولو پر سر یې پراخ لاریونونه پیل کړي دي.
اې ایف پي او رویټرز خبري اژانس د روغتونونو د مالوماتو پر اساس ویلي چې په دې اوونۍ کې د تاوتریخوالي په پېښو کې لږ تر لږه ۱۰۵ کسان وژل شوي او زرګونه نور ټپیان دي. د ډاکې میډیکل کالج روغتون چارواکي وايي چې د جولای پر ۱۹مه هلته د ۲۷ کسانو مړي وروړل شوي ول.
حکومت په هېواد کې انټرنیټ تړلی دی او امنیتي سرتېري د ډاکې په لارو کوڅو کې ګزمې کوي.
د بشري حقونو ادارو د امنیتي ځواکونو په کړنو نیوکې کړې دي او اروپايي ټولنې ویلي دي چې د تاوتریخوالي او د خلکو د مرګ ژوبلې په اړه ژوره اندېښنه لري.
د بشري حقونو ډلې د وزیراعظمې شیخ حسینه واجد حکومت تورن کړی دی چې په واک کې د پاتې کېدو لپاره له دولتي بنسټونو ناوړه ګټه اخلي او د مخالفینو د ماورای عدالت وژنو په ګډون د مخالفت مخه نیسي. لاریون کوونکو له وزیراعظمې د استعفا غوښتنه کړې ده.
بلخوا حکومت وايي مظاهره چیان دې په سرکاري ملازمتونو کې د کوټې د نظام په اړه د سپریم کورټ پرېکړې ته انتظار وکړي.
