د امریکا په پلازمېنه واشنګټن کې زرګونو کسانو د کانګرس د دواړو جرګو ګډې غونډې ته د اسراييلي وزیراعظم بنیامین نتنیاهو د وينا پر مهال مظاهره وکړه.
مظاهرچیانو په غزې تړانګه کې د اسراییلو جګړه او نتنیاهو وغنده.
اسراييلي وزیراعظم کانګرس ته په وینا کې د امريکا د ملاتړ مننه وکړه او ټینګار يې وکړ چې تیار دی چې د "بشپړې بريا" ترلاسه کولو پورې به د حماس، چې امریکا او اروپايي ټولنه یې ترهګره ډله بولي، پر ضد جګړې ته دوام ورکړي.
په کانګرس کې د ډېموکراټ ګوند تر ۵۰ زیاتو غړو مخ د جګړې د پر وړاندې بیولو د څرنګوالي په اړه احتجاجاً د نتنیاهو د وينا په غونډه کې ګډون و نه کړ.
مظاهرچيان د استوګني له ځایونو څخه تر تېرېدو وروسته د واشنګټن د ځمکلاندې اورګاډو یا مېټرو مرکزي تمځي مخې ته ورغونډ شول. کله چې مظاهرچیانو د امريکا لوی بیرغ ښکته کړ نو پوليسو اقدام وکړ او لږترلږه يو کس يې ګرفتار کړ.
حماس د ۲۰۲۳ز کال د اکتوبر پر اوومه پر اسراییلو برید وکړ چې پکې خواوشا ۱،۲۰۰ اسراييليان يې ووژل او ۲۴۰ کسان یې یرغمل کړل. وروسته یوشمېر یرغمل کسان د یو جوړجاړي له لارې خوشې شول.
اسراییلو د حماس د برید په غبرګون کې په غزې تړانګه کې سختې پوځي کاروايۍ ته دوام ورکړی دی.
په غزه کې روغتیايي چارواکي وايي، په هغه جګړه کې د وژل شويو فلسطينيانو شمېر تر ۳۷،۰۰۰ اوښتی دی چې زياتره يې ښځې او ماشومان دي. د جګړې پر مهال له ۸۵،۰۰۰ زيات فلسطينيان ژوبل شوي هم دي.
