د عوامي نېشنل ګوند د خیبر پښتونخوا صوبايي مشر ميا افتخار حسين وايي چې د استخباراتي ادارې - ای ایس ای - پخواني مشر لېفټیننټ جنرال فيض حميد ته دې له قانون سره سمه سزا ورکړل شي.
ميا افتخار حسېن دا څرګندونې د اګست پر ۱۶مه د سوات په مېنګوره کې بابړې غمیزې په یاد د عوامي نېشنل ګوند له خوا جوړې شوې غونډې ته په وينا کې کړې دي. په دې غونډه کې د عوامي نېشنل ګوند د غړو تر څنګ په سلګونه ځايي خلکو او فعالانو برخه اخیستې وه.
نوموړي تور پورې کړی چې پخواني پوځي جرنېل فېض حميد د خپلو اختياراتو د ناسم استعمال په کولو سره له وسله والو سره لوظنمامې کړې وې. میا افتخار حسېن وویل، "فېض حميد چې کله د استخباراتي ادارې مشر وو نو د خپلو اختياراتو ناسم استعمال يې کړی وو."
د عوامي نېشنل ګوند صوبايي حسېن شاه یوسفزي پوښتنه راپورته کړه چې د ده په وینا، له افغانستان څخه ۴۰ زره پاکستاني وسله والو چا راوستل او چا ورسره تړون وکړ؟
دا په داسې حال کې ده چې د پاکستان پوځ وايي د استخباراتي ادارې (ای ايس ای) پخواني مشر جنرال فیض حمید د مقدمې په تړاو یې درې نور پخواني افسران هم نیولي دي.
د پوځ د عامه اړیکو دفتر (ای اېس پي ار) د اګست پر ۱۵مه په لنډ بیان کې ویلي دي چې له "پخوانیو افسرانو او د هغوی له ملګرو څخه د مشخصو سیاسي ګټو ترلاسه کولو لپاره د بې ثباتۍ زېږولو" په تور "نورې پلټنې روانې" دي.
دا له هغه وروسته ده چې پوځ د اګست پر ۱۲مه په بیان کې وویل چې فېض حمید یې نیولی او د هغه پر وړاندې د پوځي قوانینو له مخې مقدمه روانه ده. ای اېس پي ار هغه مهال ویلي ول چې فېض حمید یې د درغلیو په مقدمه کې د پاکستان د سپريم کورټ د امر پر اساس نیولی دی.
