د اوکراین د پلازمېني کییف چارواکو د ښار اوسېدونکو ته امر کړی چې د سېپټېمبر پر پینځمه دې له پناه ځایونو څخه نه وځي.
هغوی دا خبرداری په داسې حال کې ورکړی چې د چارواکو په خبره، روسیې د سېپټېمبر پر څلورمه شپې مهال په کییف کې د بې پیلوټه الوتکو حملې پېل کړې.
د کییف ښاروال وېتالي کلېچکو پر ټېلېګرام ليکلي، "د مرکز [کییف] په فضايي حدودو کې لا هم څو بې پیلوټه الوتکې شته نو تاسې له پناه ځایونو څخه مه وځئ."
په کییف کې د پوځي ادارې مشر سېرګې پوپکو د ښار اوسېدونکو ته ویلي چې خبرداری پر ځای دی"او هلته د هوايي دفاع کار روان دی. تر هغو چې د هوايي حملې د خبرداري زنګ نه وي بند شوی، [خلک دې] په خوندي ځایونو کې پاتې شي."
د اوکرین پوځ ویلي چې د روسیې بې پیلوټه الوتکو د چرنيهېف او سومي په ګډون څو نورې سیمې په نخښه کړې دي.
