ټاکل شوې چې د ملګرو ملتونو د امنیت شورا د سېپټېمبر پر ۱۸مه د افغانستان په اړه غونډه وکړي.
په افغانستان کې د ملګرو ملتونو مرستندویه ماموریت یا یوناما وايي، د افغانستان لپاره د ملګرو ملتونو د سرمنشي ځانګړې استازې او د یوناما مشره روزا اوتنبایېوا به د امریکا په نیو یارک کې د امنیت شورا غونډې ته د افغانستان د وضعیت په اړه معلومات ورکړي.
یوناما د سېپټېمبر پر ۱۷مه پر اېکس په بیان کې ویلي دي چې د امنیت شورا په هغه غونډه کې به پر ښځو او نجونو د طالبانو د محدودیتونو پر زیاتېدو هم بحث وشي.
هغه غونډه پر داسې مهال کېږي چې د طالبانو حکومت په اګست کې د امر بالمعروف او نهي عن المنکر نوی قانون نافذ کړ چې د امنیت شورا یې د سېپټېمبر پر شپږمه د لغوه کولو غوښتنه وکړه. تر دې مخکې یوناما ویلي ول چې هغه قانون په افغانستان کې "د وېرې فضا" زېږولې ده.
بېلابېلو نړیوالو سازمانو طالبان د ۲۰۲۱ز کال په اګست کې پر افغانستان له واکمنېدو راهيسې په وار وار د بشري حقونو، په ځانګړې توګه د ښځو له حقونو په سرغړونو تورن کړي دي خو د هغوی حکومت وايي چې د "شریعت په چوکاټ" کې یې د ټولو وګړو حقونه خوندي کړي دي.
