په خیبر پښتونخوا کې سرکاري وکیلانو د خپلو غوښتنو تر منل کېدو پورې د احتجاج په توګه له عدالتونو پرېکون اعلان کړی دی.
څارنوالانو د سېپټېمبر پر ۱۸مه په پېښور کې د یوې غونډې پر مهال وویل چې هغوی له ۲۰۱۵ز کال راهيسې د خيبر پښتونخوا له حکومته په تنخاګانو کې د زياتوالي، د هغوی لپاره د ځانګړې ودانۍ جوړولو او د ښځو وکیلانو لپاره د اسانتیاوو غوښتنه کوي خو صوبايي حکومت تر اوسه "هېڅ اقدام نه دی کړی."
د سرکاري وکیلانو د اتحادیې مشر سنګین شاه مشال راډیو ته وویل چې په عدالتي نظام کې کاروايۍ او د قضيو پرمخ وړل یو مهم رول لري خو د هغه په وينا، حکومت د سرکاري وکیلانو ستونزو ته پام نه کوي، چې ورسره دوی له مالي مشکلاتو سره مخامخ شوي دي.
نوموړي زیاته کړه چې د غوښتنو تر پوره کېدو پورې به یو څارنوال هم په عدالتي کاروایۍ کې برخه نه اخلي.
د خيبر پښتونخوا حکومت لا د سرکاري وکیلانو د احتجاج او غوښتنو په اړه څه نه دي ويلي.
