اسراییلو ویلي چې د سېپټېمبر پر ۲۴مه یې په لبنان کې د حزب الله، چې امریکا یې ترهګره ډله بولي، یو لوړپوړی قومندان ابراهیم قبیسي وژلی دی.
د اسراییلو پوځ ویلي چې قبیسي د ۲۰۰۰ز کال هغه برید پلان کړی وو چې پکې درې اسراییلي پوځیان تښتول شوي او بیا وژل شوي ول.
په ورته وخت کې حزب الله ډلې د قبیسي وژنه تایید کړې ده.
دا په داسې حال کې ده چې په لبنان کې د اسراییلو د پوځ د دوه ورځنۍ بمبارۍ پر مهال له ۵۶۰ زیات کسان وژل شوي او زرګونه خلک له سیمې کډه شوي دي.
اسراییلو تر دې وړاندې د سېپټېمبر پر ۲۱مه هم د حزب الله ډلې د یو بل قوماندان ابراهیم عقیل د وژلو ادعا کړې وه.
په داسې حال کې چې اسراییل او لبنان د پراخې جګړې په درشل کې دي، حزب الله د سېپټېمبر پر ۲۴مه پر اسراییلو لسګونه توغندي وویشتل او د بارودي موادو کارخانه یې په نخښه کړه. اسراییلو ویلي چې الوتکو یې په جنوبي لبنان او په بکا وړوکي ښار کې د حزب الله ډلې د وسلو پر زېرمتونونو او د راکټونو پر دستګاهو "پراخ بریدونه" کړي دي.
لبنان د اسراییلو په شمال کې پروت دی او اهل تشیع ډله حزب الله هلته فعاله ده. حزب الله په ۱۹۸۰مه لسیزه کې د اسراییلو پر وړاندې د مقاومت لپاره جوړه شوه او په سیاسي، نظامي او ټولنیزو برخو کې فعاله ده. هغه ډله په لبنان کې د یو سیاسي ګوند په توګه هم کار کوي او په پارلېمان کې استازي هم لري.
