د اوکراین ولسمشر وولودیمیر زېلېنسکي د سېپټېمبر پر ۲۶مه په سپینه ماڼۍ کې له خپل امریکایي سیال جو بایډن سره کتلي دي.
دا تر هغې وروسته ده چې امریکا د کییف لپاره د مېلیاردونو (اربونو) ډالرو پوځي مرسته اعلان کړه او ټینګار یې وکړ چې روسیه به نور پر اوکراین خپل یرغل و نه غځوي.
زېلېنسکي ولسمشر بایډن ته هغه پلان وړاندې کړ چې دی یې "د بریا پلان" بولي او یو ځل بیا یې د اوږد واټن ویشتونکو وسلو پر استعمال د بندیز لیرې کولو غوښتنه وکړه. که هغه محدودیت لیرې شي نو اوکراین به د روسیې دننه پر پوځي اهدافو بریدونه ترسره کړای شي.
بایډن په خپل دفتر کې زېلېنسکي ته د "بریا پلان" پر وړاندې کولو مننه وویله او زیاته یې کړه چې روسیه به نه بریالۍ کېږي، بلکې اوکراین به بریالی شي او واشنګټن به له کییف سره ولاړ وي.
زېلېنسکي وروسته له مرستیالې ولسمشرې او د ډېموکراټ ګوند د ولسمشرۍ له نوماندې کاملا هیرېس سره هم ولیدل او له هغې سره یې هم خپل پلان شریک کړ.
