پښتونخوا نیشنل عوامي ګوند ادعا کړې چې حکومت یې په تېرو څو ورځو کې د زده کوونکو سازمان د مشر په ګډون شاوخوا ۲۵ غړي او پلویان نیولي دي.
ګوند وايي چې په نیول شویو کې د پښتون ژغورنې غورځنګ (پي ټي اېم) پلویان هم شامل دي.
د ګوند یو مشر مختار خان یوسفزي د اکتوبر پر شپږمه په مینګوره پرېس کلب کې خبریالانو ته وویل چې د پاکستان اساسي قانون هر چا ته د احتجاج او سیاسي هلو ځلو اجازه ورکوي.
نوموړي زیاته کړه چې حکومت د اکتوبر پر ۱۱مه په خیبر کې پي ټي اېم د لویې جرګې ناکامولو هڅې کوي چې پایلې به یې د هېواد لپاره ښې نه وي.
په سوات کې د ګوند د زده کوونکو یو مشر علي نامدار مشال راډیو ته وویل چې حکومت د خلکو خاموشه کولو هڅه کوي خو زیاته یې کړه چې دوی به د خپلو حقونو لپاره هلو ځلو ته دوام ورکوي.
د سوات پولیسو لا د پښتونخوا نیشنل ګوند د غړو نیولو په اړه څه نه دي ویلي، خو د خیبر پښتونخوا حکومت بیا ویلي چې د عامه نظم ګډوډولو په تور د پښتون ژغورنې غورځنګ ځینې غړي نیول شوي دي.
