د بر جنوبي وزیرستان په سره روغه (سره راغه) تحصیل کې د پوځ پر ګاډي په بمي بريد کې یو سرتېری وژل شوی او دوه ژوبل دي.
د هغې ضلعې پولیسو او استخباراتي چارواکو، له رسنیو سره د خبرو اجازې نه لرلو له کبله، د نوم نه ښوولو په شرط مشال راډيو ته ويلي چې د نومبر پر ۲۶مه ماسپښین مهال د بر جنوبي وزيرستان په بنګيواله سیمه کې د پوځ ګاډی د سړک پر غاړه پر ښخ بم وخوت.
ځايي اوسېدونکو مشال راډيو ته ویلي چې تر بريد وروسته پوځ د جنوبي وزيرستان د مکین سیمې لوی سړک د اتو ساعتونو لپاره بند کړی وو چې له امله يې خلک له ستونزو سره مخامخ شول.
د چاودنې ذمه واري لا چا نه ده منلې خو امنيتي ځواکونو په سیمه کې د لټون عملیات پیل کړي دي.
