د ترکیې ساحل ساتونکي ځواک ۳۲ افغان کډوال د اژه سمندرګي له شمالي څنډې څخه نیولي دي.
د ترکيې سرکاري رسنۍ انادولو اژانس د دیسمبر پر۲۹مه خبر ورکړی چې دا افغان کډوال له یوې ربړي بېړۍ نیول شوي چې ۱۶ پکې ماشومان دي. نیول شوي کډوال بېرته د کډوالۍ مرکزونو ته استول شوي دي.
افغان کډوال اکثر په قاچاقي توګه د ترکیې له ځینو ساحلي سیمو د اژه سمندرګي له لارې په وړو او غیرمعیاري بېړیو کې د یونان ټاپوګانو ته د رسېدو په هدف ځانونه په خطرو کې اچوي.
هر کال د سلګونو هغو کډوالو د مړینې او ډوبېدو خبرونه خپریږي چې غواړي له ترکیې د اوبو یا ځمکې له لارې اروپا ته ولاړ شي.
