د اسراییلو پوځ په غزه کې ځیني اهداف په نخښه کړې دي او دړکه یې کړې ده چې که د حماس ډلې لخوا یرغمل نیول شوي کسان زر خوشې نه کړل شول نو د هغې ډلې پر ضد به له زیات پوځي ځواک نه کار واخلي.
د فلسطین د روغتيا وزارت چارواکو د مارچ پر ۱۸مه په هغو حملو کې د لږ تر لږه ۱۰۰ کسانو د وژنې خبر ورکړی دی.
رايټرز اژانس د حماس په حواله ليکلي چې اسراييلو د بريدونو په کولو نه يوازې د اوربند لوظنامې سرغړونه کړې بلکې په غزه کې ۵۹ يرغمل اسراييليان يې له يوه نامعلوم برخه ليک سره مخامخ کړي دي.
امريکا او اروپايي ټولنه حماس يوه ترهګره ډله بولي.
د اسراييلي وزيراعظم بېنيامن نتنياهو دفتر په يو بيان کې پر حماس د يرغمليانو نه خوشې کولو تور پورې کړی او زياته کړې يې ده چې تر دې وروسته به د دې ډلې پرضد له زيات پوځي قوته کار واخلي.
په واشنګټن کې د سپينې ماڼۍ يو وياند ويلي، اسراييل پر غزې تر هوايي حملو مخکې د ولسمشر ډانلډ ټرمپ له ادارې سره رابطه کړې وه.
