د نیپال د ۱۹ کلنو کرکټ لوبډلې د درې یو ورځنیو سیالیو په وروستۍ لوبه کې د افغانستان د ۱۹ کلنو لوبډلې ته په ۸۵ منډو ماتې ورکړه.
د اپرېل پر نهمه د مولپاني په لوبغالي کې د سیالۍ پچه افغانستان وګټله او لومړی یې د توپ اچونې (بالېنګ) پرېکړه وکړه.
د نیپال ټول لوبغاړي په ۴۵م اوور کې په ۱۹۱ منډو وسوځېدل.
په ځواب کې د افغانستان لوبغاړو ښه توپوهنه و نه کړای شوه او پینځه لوبغاړي یې یو په بل پسې ژر، ژر وسوځېدل. البته د باران له وجې لوبه وځنډېده.
وروسته د سیالۍ منتظمینو او څارونکو چې د ډکورت-لیوس-سټرن (ډي اېل اېس) په طریقه د لوبې حساب وکړ چې له مخې یې نیپال په ۸۵ منډو بریالی اعلان شو.
افغان لوبډلې وار له مخه د لومړیو دوو سیالیو په ګټلو لوبلړۍ په خپل نوم کړې ده.
