ټانک کې د پوځیانو پر ګاډي برید کې ۱ سرتېری وژل شوی دی
- لیکوال/لیکواله اشتیاق مسید
د خیبر پښتونخوا د ټانک ضلعې په کوټ اعظم سیمه کې د فبرورۍ اتمې پر سهار وسلوالو د پوځ پر ګاډي برید کړی دی چې پکې یو سرتېری وژل شوی دی.
د ضلعې انتظامي مشر (ډېپټي کمېشنر) محمد شعېب وویل چې وسلوالو سهار شاوخوا اووه نیمې بجې پر ګاډي ډزې وکړې.
د حملې ذمه واري لا چا نه ده منلې.
د کورمې پاړه چینار کې د انتخاباتي بهیر انځورونه
- لیکوال/لیکواله طارق اورکزی
د کورمې د پاړه چینار په لقمانخېلو سیمه کې خلکو رایو کارولو ته دوام ورکړی دی.
په دې ترڅ کې خلک هلته یو ځايي ښوونځي ته ورغونډ شوي دي.
په لقمانخېلو کې په تېرو ورځو کې واوره ورېدلې وه.
د پاکستان د بشري حقونو کمېشن: حکومت دې ژرترژره انټرنېټ او ټېلېفوني شبکه بحاله کړي
د پاکستان د بشري حقونو کمېشن پر حکومتي چارواکو غږ کړی دی چې ژرترژره دې په ټول هېواد کې د موبایل ټېلېفون شبکه او انټرنېټ بحال کړي.
هغې خپلواکه ناحکومتي ادارې د فبرورۍ پر اتمه پر اېکس په بیان کې لیکلي دي چې سیند های کورټ لنډمهالي وفاقي حکومت ته امر کړی وو چې د عامو انتخاباتو پر ورځ دې د موبایل ټېلېفون شبکه او انټرنېټ بحال وساتي، خو پر دې سربېره په زیاتره سیمو کې ځنډول شوی دی.
کمېشن په بیان کې ویلي دي چې د پاکستان د مخابراتي چارو ادارې (پاکستان ټېلېکمیونیکېشن اتارټي یا پي ټي اې) ویلي دي چې حکومت ورته د انټرنېټ تړلو امر نه دی کړی نو په دې صورت کې په دې اړه د شفافیت نه شتوالی د "اندېښنې وړ" دی چې دا تعطل به تر کوم وخت پورې روان وي.
هغې ادارې زیاته کړې ده چې د شبکې او انټرنېټي خدماتو ځنډول معلوماتو ته د خلکو د لاسرسي حق او ښايي د پایلو د ترسیل نظام اغېزمن کړي.
دا تر هغې وروسته ده چې د کورنیو چارو وزارت د فبرورۍ پر اتمه په بیان کې وویل چې د موبایل ټېلېفون او انټرنېټي خدمات یې د امنیت ټینګښت لپاره ځنډولي دي.
وزارت ویلي دي چې دا کار یې په وروستیو کې په هېواد کې د ترهګرۍ پېښو ته په کتو کړی دی.
ډېره اسماعیل خان کې چاودنې ۵ سرتېري وژلي دي
د خیبر پښتونخوا په ډېره اسماعیل خان کې په چاودنه کې پینځه پولیس وژل شوي او دوه ژوبل دي.
د هغه ښار کمېشنر ظفر الاسلام مشال راډیو ته وویل چې د سړک تر غاړې بم چاودنه په کلاچۍ کې شوې ده.
د حملې ذمه واري لا چا نه ده منلې.
دا په داسې حال کې ده چې وسلوالو د فبرورۍ پر اتمه سهار شاوخوا اووه نیمې بجې له ډېره اسماعیل خان سره پر پوله په پروت ښار ټانک کې د پوځ پر ګاډي په برید کې یو سرتېری ووژل شو.
د ضلعې انتظامي مشر (ډېپټي کمېشنر) محمد شعېب مشال راډیو ته وویل چې وسلوالو پر ګاډي ډزې وکړې.
د هغې حملې ذمه واري هم لا چا نه ده منلې.