په داسې حال کې چې د فبرورۍ پر ۲۴مه پر اوکراین د روسیې د یرغل دوه کاله پوره کېږي، امریکا پر مسکو نوي بندیزونه لګوي.
د امریکا اې بي سي نیوز د فبرورۍ پر ۲۲مه د مالیې وزارت ویاند له خولې ویلي دي چې واشنګټن د فبرورۍ پر ۲۳مه پر روسیې او د هغه هېواد د حکومت پر ملاتړ کوونکو شبکو تر ۵۰۰ زیات بندیزونه عملي کوي.
د امریکا یوې لوړپوړې ډېپلوماټې وېکټوریا نولینډ ویلي دي واشنګټن پر اوکراین د روسیې ولسمشر ولادیمیر پوتین د پراخ یرغل د دوو کلونو پوره کېدو او د روسي حکومت د مخالف سیاستوال الېکسي نوالني د مړینې په غبرګون کې "ځپونکي بندیزونه اعلانوي."
هغې وویل چې زیاتره بندیزونه به د پوتین "د جګړې ماشین" هدف وګرځوي.
له موضوع خبرو چارواکو هم اې بي سي نیوز ته ویلي دي چې د بندیزونو هدف د روسیې دفاعي څانګه او هغه ادارې دي چې وار له مخه ورباندې بندیزونه لګول شوي دي.
په همدې حال کې برېتانیې هم پر هغو روسیو شرکتونو او وګړو د بندیزونو پراخولو اعلان کړی دی چې ورباندې شک دی چې له پخوانیو بندیزونو څخه یې د مسکو په ژغورلو کې مرسته کوله.
روسیې د ۲۰۲۲ز کال د فبرورۍ پر ۲۴مه پر اوکراین یرغل وکړ او د هغه هېواد ځینې برخې یې نیولي دي.
له هغه وخت راهیسې هلته د دواړو خواوو ترمینځ جګړه دوام لري چې پکې زرګونه سرتېري وژل شوي دي، ګڼو اوکراینیانو ته مرګژوبله اوښتې او لکونه ولسي وګړي کډوال او بې کوره شوي دي.
