روسیې د راسخ العقیده یا اورتوډوکس عیسویانو تر اختر (کرېسمس) یوه ورځ وروسته پر اوکراین د توغندیو نوي بریدونه پیل کړي دي او ورسره په دونباس سیمه کې ځمکنۍ جګړه هم شدیده شوې ده.
د روسیې او اوکراین په ګډون د ختیزې اروپا زیاتره وګړي اورتوډوکس عیسویان دي چې د جنورۍ پر اوومه کرېسمس لمانځي.
د اوکراین پر ښارونو کې د روسیې بریدونه د جنورۍ پر اتمه نیمه شپه پیل شول.
اوکرایني چارواکي وايي، د جنورۍ پر اتمه روسیو ځواکونو پر یوشمېر ځایونو ډزې وکړې چې پکې زپورېژیا ښار، د دنیپروپېتروفسک سیمې کلي او په دونباس کې کراماتورسک او کوستیانتېنیفکا سیمې شاملې دي.
چارواکي وايي، په حملو کې یوشمېر کسان وژل شوي دي.
د اوکراین په جنوب کې د خېرسون پوځي ګورنر یا والي پر مسکو تور پورې کړی دی چې د ښار په یوه برخه کې یې په بمبارۍ کې اورلګوونکې وسلې کارولې دي.
په همدې حال کې د اوکراین د دفاع وزارت مرستیالې هانا ملیار ویلي دي چې په دونېڅک کې د پوځیانو ترمینځ شدیده جګړه روانه ده.
د اوکراین دونباس سیمه له دونېڅک او لوهانسکه جوړه ده چې روسي ولسمشر ولادیمیر پوتین د ۲۰۲۲ز کال په مني کې له خپل هېواد سره وتړل.
