افغان تکوانډو کار روح الله نیکپا چې د لندن المپیکس په لوبو کې یې د برونز مډال ترلاسه کړ د افغانانو لپاره په یو اتل بدل شوی او له تیرې شپې راهیسې هر چیرې د ده او د ده د بریا په اړه خبرې کیږي.
د لندن د المپیک په لوبو کې د روح الله نیکپا څلور واړه مسابقې د افغانستان په ټولو سیمو په ځانګړي توګه په کابل ښار کې سلګونو زرو کسانو ولیدې او هر یوه افغان ده ته د بریا دعا کوله.
د کابل ښار څو تنو اوسیدونکو مشال راډیو ته وویل، چې ان دوي او د دوي په څیر زرګونه نور کسان په کابل ښار کې د شپې تر دوو بجو پورې خپلو تلویزیونونو ته ناست وو او د روح الله نیکپا لوبې یې کتلې او هغه ته یې دعاګانې کولې:
"۱- زما نوم مقصود دی او د کابل ښار د مکروریانونو اوسیدونکی یم، نیکپا ډیر ښه وځلید او د افغانانو د ویاړ سبب شو.
زه هم تر دوو بجو د شپې ناست وم د پولینډ، مرکزي افریقا او بریتانیې تکړه لوبغاړو ته یې قوي ماتې ورکړه.
۲- زه اصف نومیږم او د کابل د ده سبز اوسیدونکی یم،روح الله چې په لندن کې لوبه وګټله موږ ډیر خوښ شولو او هیله ده چې نثار احمد هم تش لاس را نشي ،دا به مونږ ته ډیره خوشحالي وي".
روح الله نیکپا د لندن د المپیک په لوبو کې د پولینډ، مرکزي افریقا او بریتانیې لوبغاړو ته په جرات سره ماتې ورکړه، خو د یوې نمرې په توپیر یې له خپل ایراني سیال محمد باقرمعتمد څخه ماتې ومنله.
د یو شمېر کسانو په خبره د لندن د المپیک په لوبو کې د نیکپا مسابقې ان د کابل ښار په دهمزنګ څلور لارې کې د یوه خصوصي شرکت له خوا د یوه غټ ټلویزیون په ایښودلو سره خلکو ته ور ښودل کیدې چې ویل کیږي زرګونه تنه ځوانان او مشران ورته په سړک ناست وو او د ده لوبه یې کتله.
دغه راز د ولسمشر کرزي سلا کار شهزاده مسعود مشال راډیو ته وویل، چې ولسمشر کرزي هم د لندن دالمپیکس په لوبو کې د روح الله نیکپا لوبه وکتله، همدا شان د ولسمشر کرزی دوهم مرستیال کریم خلیلي په لندن کې د افغانستان د المپیکس د ملي کمیټې له رییس جنرال ظاهر اغبر سره په ټیلیفون خبرې وکړې او د نیکپا د بریا په اړه یې هغه ته مبارکي وویله.
روح الله نیکپا د بیجینګ د ۲۰۰۸ کال د المپیک په لوبو کې هم د افغانستان په تاریخ کې د لومړي ځل لپاره د برونزو مډال ګټلی وو.
ټاکل شویده چې بل تکړه افغان تکواندو کار نثار احمد بهاوي هم نن مازدیګر د لندن دالمپیکس په لوبو کې د خپل سیال پر وړاندې میدان ته ووځي،د افغانستان خلک د بهاوي لپاره هم د بریا تمه او دعاګانې کوي او هیله ښیی چې هغه له نیکپا څخه هم ښه لوبه وکړي او د سرو مډال ترلاسه کړي.
