د هنګري وزیر اعظم ويکتور اوربان د دې هېواد په پارلماني انتخاباتو کې د خپلې بريا اعلان وکړ.
ده چې په پلازمېنه بوداپیسټ کې د خپل ګوند فيدس پلويانو ته خبرې کولې وويل، د انتخاباتو نتايجو د ده حکومت هغه پاليسۍ تاييد کړې چې پکې خلکو ته کار موندنه، د کورنيو ملاتړ او د ملي حاکميت لپاره مبارزه شامله ده.
تر اوسه د انتخاباتو ٩٦ فيصده رايې شمېرل شوې دي.
ښايي فيدس ګوند د پارلمان په ١٩٩ څوکيو کې ١٣٣ سيټونه خپل کړي او دا د دې ضمانت کوي چې دغه ګوند به بل حکومت جوړ کړي.