لومړني نتایج ښيي چې پېترو پوروشینکو د انتخاباتو په لومړۍ دوره کې واضح اکثریت ګټلی دی. پوروشینکو د مقدماتي نتایجو له اعلانه سمدستي وروسته وویل، د ده لومړنی ماموریت به د جګړې ختمول او د سولې ټینګښت وي.
ده همداراز اعلان وکړ چې لومړی سفر به یې د اوکراین ختیځ ته وي چې د روس پلوه یاغیانو تر ولکې لاندې دی. ده زیاته کړه چې اوکراین به هېڅکله د کریمیا ټولپوښتنه او اشغال په رسمیت ونه پېژني.
پوروشېنکو همداراز یادونه وکړه چې د اوکراین خلکو په اروپايي ټولنه کې د دې هېواد د شاملېدو لاره غوره کړې ده. د پوروشینکو اصلي سیالې پخوانۍ وزیراعظمې یولیاتیماشینکو خپله ماتې ومنله.
سپینې ماڼۍ په یوه بیان کې ویلي چې د امریکا ولسمشر بارک اوباما د اوکراین د دولت له راتلونکې ولسمشر سره د ګډ کار په هیله دی.