په نننۍ غونډه کې به له افغانستانه د ناټو پوځیانو د ایستلو په اړه هم بحث وشي. تېره ورځ د ناټو مشر اندرس فوغ راسموسېن وویل، دوی لږ وخت لري چې په افغانستان کې خپل ماموریت پای ته ورسوي:
((موږ ته یوازې څو میاشتې پاتې دي چې په افغانستان کې د جګړې ټول ماموریت بشپړ کړو. په عین حال کې به موږ په افغانستان کې د خپلو نویو ذمه واریو په اړه خبرې کوو چې له راتلونکي کاله افغان پوځیان وروزو، مشورې ورکړو او مرسته ورسره وکړو.))
په نننۍ غونډه کې د افغانستان د دفاع وزیر بسم الله محمدي، د اروپايي ټولنې د بهرنیو چارو د تګلارې مشره کیترین اشټن او د افغانستان لپاره د ملګرو ملتونو ځانګړی استازی یان کوبېش هم ګډون کوي.