د پاکستان په کراچۍ ښار کې د هدفي وژنو او تاوتریخوالي په تازه پېښو کې اووه کسان وژل شوي دي.
پولیس وایي چې د تاوتریخوالي دا پیښې تېره شپه د کراچۍ په اورنګي ټاون ، بلدیه ټاون ، ګلبهار او لانډي سېمو کې رامنځ ته شوې دي.
په کراچۍ کې له تېرو شاوخوا یوولس میاشتو راهسې د هدفي وژونکو ، قلنک اخیستونکو او نورو وسله والو پر ضد د لټون عملیات روان دي چې له امله یې د وژنو کچه تر یو څه وخته له ټیټېدو وروسته بیرته زیاته شوې ده.
بل پلو د کراچۍ پولیس وایي چې د روژې د میاشتې په مناسبت یې د ښار په بېلا بېلو برخو کې امنیت ټینګ کړی دی او د جوماتونو او امام بارګاو مخې ته یې د پولیس سرتیرو شمیر زیات کړی دی.