د لندن کنفرانس د برېتانيا بهرنيو چارو وزير فیلیف هامونډ او د افغانستان اجراييه رييس ډاکټر عبدالله عبدالله په پرانيستونکو ويناوو سره پيل شو.
د لندن کنفرانس د افغانستان په اړه یوه پراخه اجنډا لري، چې پکې نوی افغان حکمت به د خپلو هغو اصلاحاتو په اړه چې د اداري فساد مخنیوي او د اقتصادي ودې او پرمختیا په لړ کې یې کړې دي، نړۍوالې ټولنې ته بیان کړي.
په لندن کنفرانس کې برخوال د افغان ولسمشر ویاند نظیف الله سالارزی وايي، 'په افغانستان کې اصلاحات به افغانان پرمخ وړي' له هغه سره شوې مرکه په لاندینې پیوند کې اورېدلی شئ.
ستاسې سېسټم د HTML5 په چلولو کې ستونزه لري.
له لندن کنفرانسه حامد مومند له تازه مالوماتو سره
همداراز د نړۍوالې غونډې تر پیلېدو وړاندې د برتانیا د نړۍوالې پراختیا وزیر جسټن ګرینینګ له افغان خبریالانو سره په خپلو څرګندونو کې وویل، چې نړۍواله ټولنه هم ځینې غوښتنې او هیلې لري، هغه دا چې نوی افغان حکومت باید د اداري فساد پر ضد پراخه مبارزه وکړي او خپل اداري او اقتصادي اصلاحات په سنجیده توګه پلي کړي. د بشري حقونو او پیتېره د ښځو په برخه کې د بنیادي خدماتو په برخه کې یې د افغانستان حکومت د خپل ولس لپاره وړاندې کړي. او په دې برخه کې باید روڼ، جوت او څرګند پروګرامونه ولري.
د لندن کنفرانس په ټوکیو کنفرانس پسې پیلی جوړېږي چې په هغه کې نړۍوالو بسپنه ورکوونکو هېوادونو له افغانستان سره د ۱۶ میلیارده ډالرو مرسته اعلان کړې وه. په لندن کنفرانس کې نوې ژمنې نه کېږي، یواځې پر هغو مرستو به ټینګار کېږي چې له افغانستان سره شوې وې. د بریتانوي چارواکو په خبره دا یوه ښه موقع ده چې له نړۍوالې ټولنې سره به د افغانستان حکومت خپلې اړیکې بیا ټینګې کړي او له هغوی څخه د تلپاتې ملاتړ لپاره ژمنې واخلي.
د افغانستان حکومت ټوکیو کنفرانس کې ژمنه کړې وه چې د نړۍوالو مرستو په بدل کې به اصلاحات راولي او د فساد پر وړاندې به اغېزمنه مبارزه کوي.
د توکيو له کنفرانس وروسته پرېکړه وشوه، چې د بهرنيو چارو وزيرانو په کچه به يو لړ غونډې وشي، چې له افغانستان سره د شويو مالي مرستو او افغان حکومت کې د اصلاحاتو راوستو بهيرونه وڅارل شي.
لویدیځ د نوي افغان حکومت په باب ډېر خوشبینی دی
په لندن کنفرانس کې برخوال بهرني چارواکي له نوي افغان حکومته ډېرې هیلې لري. د لندن کنفرانس پوښښ ته تللی د ازادۍ راډيو خبریال حامد مومند د بریتانوي لوړپوړو چارواکو له خولې وايي، چې نړۍواله ټولنه د نوي افغان ولسمشر محمد اشرف غني له لوري په خپل هېواد کې د اداري فساد پر ضد، د اداري اصلاحاتو او په نورو برخو کې د هغه کړې ژمنې جدي اخلي. او تر دا اوسه د هغه له اخیستو ګامونو خوښ دي.
خو په لندن کنفرانس کې په ټوکیو کنفرانس کې له افغانستان سره د کړو مرستو پر شفافیت هم خبرې کېږي. او نړۍواله ټولنه په افغانستان کې د یوې منظمې اقتصادې ودې غوښتونکي دي.
د لندن کنفرانس جهاني برخوال
په دې کنفرانس کې د افغانستان ولسمشر محمد اشرف غني او اجراييه رييس عبدالله عبدالله په ګډون لوړپوړى دولتي پلاوى، د مدني ټولنې ٦٠ کسيز پلاوى او يو شمېر افغان خبريالان ګډون لري.
دغه راز په کنفرانس کې د برېتانيا لومړي وزير ډېوېډ کمرون، د دې هېواد نور لوړپوړي چارواکي، د امريکا بهرنيو چارو و زير جان کېري او د پاکستان لومړي وزير نواز شريف په ګډون د ٥٠ هېوادونو او ٢٥ نړۍوالو سازمانونو او ادرو استازي ګډون کوي.