د نایجیریا ولسمشر ګوډلک جانتن د ولسمشرۍ په انتخاباتو کې خپله ماته ومنله او په دې توګه د هغه سیال جنرال محمد بوهاري د نایجیریا ولسمشر شو.
د سېشنبې پر ورځ، ښاغلي جانتن د نایجېریا له ولسه د نوي مشر په ټاکلو مننه وکړه.
ګوډلک جانتن وویل چې د آزادو او عادلانه انتخاباتو په تر سره کولو یې خپله ژمنه ترسره کړه.
په دې انتخاباتو کې محمد بوهاري د نایجیریا نوی ولسمشر وټاکل شو.
د انتخاباتو رسمي نتیجې ښيي چې ښاغلي بوهاري د نایجیریا له ٣٦ ایالتونو په ډېری هغو کې رایې گټلې دي او د ټول ملت په سطح یې تر ښاغلي جانتن دوه میلیونه زیاتې رایې وړي دي.
د ښاغلي بوهاري په دې کامیابۍ سره په نایجیریا کې د خلکو ډیموکراټیک جمهوریت گوند ١٦ کلنه واکمني پای ته رسېږي.
ښاغلی بوهاري ٧٢ کلن دی او کله چې د ١٩٨٣ کال د ډیسیمبر په میاشت کې پوځي چارواکو منصبانو په یوه کودتاه کې قدرت تر لاسه کړ هغه ٢٠ میاشتې د نایجیریا پوځي واکمن و.