د خېبر پښتونخوا په ضلعه هنګو کې د ابراهیم زو سیمې خلک له حکومته غوښتنه کوي چې دوی له دې د ګیس سهولت ورکړل شي.
د نور الحسن په نامه د سیمې یو کس مشال راډیو ته وویل ،د ضلعې په ډیرو برخو کې له ډېره وخته د ګیس پایپ لاین غزول شوی خو د دوی سیمې ته تراوسه ګیس نه دی ورکړل شوی.
« ګیس زموږ د کلي په لاره هنګو ته لیږدول شوی ، نو پکار ده چې موږ ته دې هم دغه سهولت راکړل شي. دا د بې انصافۍ خبره ده چې د درېوو کیلومیټرو په فاصله کې بهادر بانډې ته د ګیسو پایپونه غزول شوي او هغوی د ګیسو سهولت لري، خو موږ ترې بې برخې یو. موږ د حکومت نه د ګیسو سهولت غواړو. »
د سید زاهد حسین میا په نامه یو ځایي مشر مشال راډیو ته وویل دا چې د ګیسو سهولت نشته نو خلک د خپل ضرورت د پوره کولو لپاره ونې او بوټي وهي چې له دې سره په سیمه کې ځنګلونه او شینکي مخ په ختمېدو دي.
« موږ لوی غر لرو چې ځنګل هم پکې شته ، د حکومت پالیسي هم داده چې ونې ، بوټې او شینکي دې زیات وي ، نو دا هله ممکنه ده چې حکومت موږ ته د ګیسو سهولت راکړي. »
په دې اړه د سیمې مرستیال کمیشنر سید غفور شاه مشال راډیو ته وویل، د سیمې د اوسېدونکو د ګیسو په هکله دغې غوښتنې ته مثبت ځواب وایي او د دوی ټولې ګیلې به ختموي خو حکومت لا تر اوسه د دې جوګه نه دی چې د سیمې د خلکو ستونزه په سمدستی توګه حل کړي.
« اوس حکومت دا فیصله کړېده چې د ګیسو د امدن په مد کې چې کومې پیسې تر لاسه کیږي ، هغه به د ګیسو د پایپ لاین په غزولو کې په کار راوستل کیږي. ددې لپاره فنډ یوه لویه مسئله ده ، خو موږ به هڅه کوو چې په کال دوه کې د ټولو سیمو خلکو ته د ګیسو سهولت ورکړو. »
د هنګو ضلعې د خال خال سیمو پرته اکثره سیمې د ګیسو له سهولته بې برخې دي.