د پنجاب د ملتان پوليسو د عامه اړيکو يو چارواکي ظهيرالدین بابر نن مشال ريډيو ته وويل چې قنديل بلوچ نن د خپل ورور په لاس وژل شوي. چارواکو دا د غيرت په نامه قتل بللی دی. پوليس وايي د قنديل بلوچ قاتل ورور د نيولو په لټه کې دي.
د نوموړي په خبره قنديل له يوې هفتې راهيسې ملتان کې خپلې سيمې ته د اختر لمانځلو لپاره تللې وه.
د قنديل بلوچ پلار پوليسو سره د خپلو شپږو زامنو څخه د دوو خلاف ايف، آيي، آر درج کړی دی. په ايف، آيي، آر کې راغلي چې د هغه يو زوی وسيم د هغه د بل زوی په وينا چې په پوځ کې نايب صوبيدار دی قنديل ووژله.
پلار يې زياتوي چې دی او ميرمن يې د کور پر چت او قنديل په لاندې خونه کې بيده وه. زوی یې د شپې ناوخته کور ته راغلی وو. د قنديل بلوچ پلار وايي چې کله سهار دوی راپورته شول نو د کور مرکزي دروازه خلاصه او زوی یې وتلی وو. په کوټه کې قنديل بلوچ وژل شوي وه. هغه تېزندۍ شوې او تشدد پرې شوی وو.
د قنديل بلوچ اصلي نوم فوزيه عظيم وو. هغې په دې وروستيوو کې داسې ويډيوګانې خپرې کړي چې پاکستان کې يې د سخت دريځو غصه راوپاروله. نوموړې د کورنيوو چارو وزارت ته په لېږلې يو خط کې ويلي وو چې ژوند ته يې خطر دی نو ځکه د ځان لپاره امنيت غواړي.
د قنديل بلوچ پر مرګ په ټولنيزو مطبوعاتو کې سخت غبرګونونه ښودل شوي دي.
د پنجاب په صوبايي اسمبلۍ کې د پاکستان حکمران ګوند مسلم لېګ (ن) غړې، حنا پرويز بټ پر ټويټر پاڼه د قندېل بلوچ د مرګ ډير دردوونکی بللی دی او ويلي يې دي چې هيڅوک د چا د ژوند اخيستو حق نه لري.
د بشري حقونو د ادارو په خبره پاکستان کې هر کال خوا او شا زر مېرمنې د غيرت په نامه وژل کيږي. له حکومته بيا بيا غوښتل شوي چې د دې وژنو د مخنيوي لپاره دې سخت ګامونه واخلي.
قندېل بلوچ له ۲۰۱۴ کال راهيسې خپلې ويډيوګانې جوړولې. هغې به دا پر فيس بوک شريکولې. د پيپلز ګوند د مشر او پخواني ولسمشر آصف علي زرداري لور بختاور زرداري بهټو پر خپله ټويټر پاڼه قاتل ته د سختې سزا ورکولو غوښتنه کړې ده.
د هندوستان مشهورې اداکارې راکهي ساونت په يوه ويډيو کې د پاکستان له وزيراعظم نوازشريف غوښتې چې د خپل هيواد د ميرمنو ژوند خوندي کړي.