له څو اوونیو راهیسي انګېرل کېدله چې د ډیموکراټانو کاندیده هیلري کلینټن تر ریپبلیکن سیال ډونالډ ټرمپ پرمخ ده، خو اوس د دوی ترمنځ کم شوي واټن پر اقتصادي بازار سخت اغېز کړی دی.
د نومبر پر لومړنۍ نېټه شوې نظرپوښتنه ښيي، د ریپبلیکنو کاندید ډونالډ ټرمپ تر مېرمن کلینټن مخکې شوی دی چې ښايي یو سبب یې د امریکا فډرالي پلټونکې ادارې «اېف بي ای» له لوري د هیلري کلینټن د برېښنالیکونو (ایمېلونو) په اړه د لا ډېرې ارزونې اعلان وي چې د دوو کاندیدانو تر منځ یې واټن راکم کړ.
له همدې کبله په والسټریټ اقتصادي بازار کې د ونډو بازار مخ پر ځوړ تللی چې په ټولیزه توګه د ونډو بیې یو فیصد ټیټې شوې دي.
هم دغه ډول د نومبر پر دویمه نېټه د اسیا، فرانکفورت، پاریس او جاپان په اقتصادي بازارونو کې هم د ونډو بازار له یو تر یونیم فیصده ټیټ شوی دی.
د یورو او هم د نړۍ د نورو اسعارو په مقابل کې د ډالرو بیه لږ تر لږه یو فیصد کمه شوې ده.
له هم دې سره د نړۍ پانګوالو په امریکا کې د یوې سیاسي کړکېچنې دورې د اندېښنو له کبله خپلې پانګې په زرو اړولي او په خوندي ځایونو کې یې زېرمه کړي دي.
د کنګس ویو اسیټ منجمنټ «Kingsview Asset Management» یا د پانګونې مدیریت ادارې مسؤل پاول نولت «Paul Nolte» روېټرز خبري اژانس ته ویلي:
"اقتصادي بازار د هیلري کلینټن د کامیابۍ پر اساس جوړ شوی دی او د ډونالډ ټرمپ بریالیتوب به هغه خراب کړي، دا هغه څه دي چې په ځینو نظرپوښتنو کې د کاندیدانو تر منځ د واټن له کمېدو سره موږ لیدلي دي."
په امریکا کې د اسعارو یو مدیر مایکل اې ګایاد «Michael A. Gayed» وایي، په هغه صورت کې چې د نړۍ اقتصادي بازارونو د هیلري کلینټن پر بریالیتوب پانګونه کړې وي او ډونالډ ټرمپ انتخابات وګټي، داسې احتمال شته چې اقتصادي بازارونه له یوه تعدیل او اغېزناکې مرحلې سره مخامخ شي.