تهمينه جنجوعه دا خبره نن د پاکستان قامي اسمبلۍ بهرنيو چارو کمېټې ته تر هغه وروسته وکړه چې د دوشنبې پر ورځ په پاکستان کې د ايران سفير د سعودي په مشرۍ په اسلامي پوځي اتحاد کې د پاکستان پر ورګډېدو اندېښنه څرګنده کړه. نوموړې په دې لړ کې د قامي اسمبلۍ بهرنیو چارو کمېټۍ یوې غونډې ته وربلل شوې وه چې په دې باب د ځینو پوښتنو ځوابونه ووايي.
د دې کمېټۍ يوې غړې نعیمې کشور نن نهې/سېشنبه مشال راډیو ته وویل چې په غونډه کې د بهرنیو چارو سېکرېټرې له ایران سره پر تعلقاتو او د سعودي په مشرۍ د اسلامي پوځي اتحاد په باب په خپلو څرګندونو کې وويل چې پاکستان د ایران او سعودی عرب ترمنځ د تاوتریخوالي کمولو هڅه کوي.
نعیمې کشور دا هم وویل چې د پاکستان او ایران ترمینځ د اړیکو په باب به په راتلونکې کې نورې غونډې هم کوي، چې هغې ته د یوې کړنلارې بڼه ورکړي.
د نوموړې په وینا د پاکستان بهرنیو چارو کمېټې غړي به په مې میاشت کې ایران ته هم ځي.
د سعودی عرب په مشرۍ د اسلامی پوځي اتحاد کمان سمبالولو په اړه د ایران لخوا په تحفظاتو د پاکستان خارجه دفتر غبرګون لا هم مخې ته نه دی راغلی.
د ګل په ورځ د ایران سفیر مهدي هنر دوست ویلي ول چې د سعودي عرب پوځي اتحاد په لړ کې د پاکستان په اقداماتو ورته تحفظات دي.
د ایران سرکاري خبري اجنسۍ په وینامهدي هنر دوست ویلي چې د پاکستان پخواني ارمي چیف جنرل راحیل شریف ته د [نه اعتراض سند] وړاندې له ایران سره څو ځلې رابطه شوې وه خو د دې مطلب دا نه دی چې ایران مطمینه دی او یا [مو] دا فېصله ومنله.
د مهدي هنر دوست په وینا د دوی هېواد په دې اند دی چې ټول اهم اسلامي ملکونه دې د یوه لانجمن پوځي اتحاد برخه جوړېدو پرځای د امن لپاره یو اتحاد جوړ کړي چې مسلې هوارې کړل شي.
ارنا خبري اېجنسۍ په وینا تهران، و اسلام اباد ته دا ویلي دي چې ایران د دې عسکري اتحاد غوندې د نورو اتحادونو هم برخه نه شي جوړېدلی او نه تر اوسه ایران ته داسې یو وړاندېز شوی دی.
د پاکستان دفاع وفاقي وزیر خواجه آصف په دا ورستیو کې د پخواني پوځي مشر جنرل راحیل شریف د سعودي عسکري اتحاد مشر جوړېدو تصدیق کړی وو.
خواجه آصف ویلي وو چې دا فېصله حکومت په اعتماد کې تر اخېستو پس شوې ده.
د سعودي عرب په مشرې اسلامي پوځي اتحاد کې د پاکستان ګډون به یې له ایران سره پر اړیکو څه اغېز وکړي؟
په دې لړ کې د سیمه ایزه چارو کارپوه او خبریال رحیم الله یوسفزی وایي چې د دې اتحاد له وجې به د دواړو ملکونو ترمینځ اړیکې اغېزمنېدلی شي.
''ایران نه غواړي چې پاکستان په یو داسې اتحاد کې شامل شي چې د هغه مشري سعودي عرب کوي او یا پکې یواځې سني ملکونه شامل وي نه چې شییعه مسلکي ملکونه. زما په خیال پاکستان دا کوشش کوي چې د ایران اعتراضونه لیرې کړي او پاکستان به دا هېڅکله هم و نه غواړي چې د ایران پرضد عملیات وکړي او یا د یو درېم ملک په جنګ کې شامل شي.''
د ۲۰۱۵ م کال په دسمبر میاشت کې د پاکستان پشمول تر دېرشو زیات اسلامي ملکونو د سعودي عرب په مشرۍ د پوځي اتحاد جوړولو اعلان کړی وو. دا اتحاد د ترهګرۍ او سختدریځۍ مخنیوي لپاره جوړ کړل شوی دی.
واضحه دې وي چې تېره اونې د پاکستان وزیراعظم قامي سلامتۍ مشیر جنرل ناصر جنجوعه ویلي ول چې جنرل راحیل شریف د سعودي عرب په مشرې د پوځي اتحاد کمان سمبالولو پس به ایران ته په دې اتحاد کې د ګډون بلنه ورکوي.