په ايران کې چارواکي وايي، د عراق او ايران له پولې سره نېږدې په زوروه زلزله کې له ۳۳۰ زیات کسان وژل شوي او تر ٢٥٠٠ ډېر نور ټپيان شوي دي.
د ايران د کورنيو چارو وزارت تر دې مخکې ويلي ول، زيات کسان په کرمان شاه ولايت کې وژل شوي دي.
د راپورونو له مخې د ریښتر په کچه ٧ اعشاريه درې درجې زلزلې ټکانونه يې په ټوله سيمه کې له ترکيې نيولې تر کويت پورې محسوس شوي دي دي.
د ايران په ګاونډ عراق کې بيا چارواکي وايي، په زلزله کې لږ تر لږه اووه کسان وژل شوي او تر ٣٢٠ زيات نور ټپيان شوي دي.
د عراق کورنيو چارو وزارت وياند بريدجنرال سعد معن وويل، دغه زیانونه د عراق شمال په کرد مېشته سيمه کې خلکو ته اوښتي دي.
ایران کې زلزله ځپلي
د امريکا د جيولوژيکي سروې اداره وايي، د زلزلې مرکز د عراق د شمال ختيځ په ٣٢ کيلومټرۍ کې تر ځمکې لاندې ٣٣ اعشاريه ٩ کيلومټره ژور وو.
د تهران پوهنتون د زلزله پوهنې مرکز ويلي، زلزله تېره شپه پر ځايي وخت ٩ بجې او ٤٨ دقيقې وشوه.
د ايران دولتي اژانس ايرنا د چارواکو په حواله راپور ورکړى چې خبردارى يې ورکړى، د مرګ ژوبلې شمېر ښايي لوړ شي.
د ایران او عراق زلزله په انځورونو کې
دوى ويلي چې د اضطراري پېښو په وړاندې د مبارزې کارکوونکو نن سهار وختي خپل کارونه پيل کړي دي.
په کرمانشاه کې د عراق د سرحد په ١٥ کيلومترۍ کې سرپل دهاب ښارګوټى ډېر ځپل شوى چې راپورونه وايي، په لسګونو کسان په کې مړه شوي دي.
ستاسې سېسټم د HTML5 په چلولو کې ستونزه لري.
د عراق د زلزلې ویډیو
ايراني چارواکي وايي، د ايران سرحدي ښارګوټى قصر شيرين هم سخت ويجاړ شوى دى او د ژغورنې کارکوونکي وايي د برېښنا د نشتوالي له کبله د دوى کارونه سخت شوي دي.
ايت الله علي خامنه اي
د ايران لوى مذهبي مشر ايت الله علي خامنه اي له دولتي ادارو غوښتنه کړې چې له اغېزمنو شويو کسانو سره د مرستې او د هغوى د ژغورنې لپاره ټولې ممکنه هڅې وکړي.
حسن روحاني
د ايران دولتي اژانس د ولسمشر حسن روحاني په حواله راپور ورکړى چې د ايران د کورنيو چارو له وزارت څخه يې غوښتي د قربانيانو د مرستې لپاره ډېرې هڅې وکړي.
حيدر العبادي
د عراق د صدراعظم دفتر ويلي چې صدراعظم حيدر العبادي د خپل هېواد د ملکي دفاع ډلې او اړوندو ادارو ته سپارښتنه کړې چې د دې طبيعي افت په وړاندې مناسب اقدام وکړي.
عبدالله عبدالله
د نړۍ ځينو مشرانو د دې پېښې په اړه عکس العمل څرګند کړى دى، د افغانستان د حکومت په استازيتوب د اجرائيه رئيس عبدالله عبدالله پيغام ته اشاره وکړو.
ښاغلي عبدالله په هغه اعلاميه کې چې اجرائيه رياست نن خپره کړې ويلي چې د زلزلې په پېښه کې د خلکو د مړينې او ويجاړيو له کبله خواشينى شوى دى.
اجرائيه رئيس د افغان حکومت او افغانانو په استازيتوب د قربانيانو له کورنيو، د ايران او عراق له حکومتونو سره خپله خواخوږي څرګنده کړې ده.
د زلزلې ټکانونه د ايران په پلازمېنه تهران، د عراق په پلازمېنه بغداد، دغه راز ترکيه، اسرائيل، کويت او نورو شا و خوا سيمو کې احساس شوي دي.
په ايران کې تر دې مخکې هم زورورو زلزلو زيانونه او مرګ ژوبله اړولې ده.
په ٢٠٠٣میلادي کال د ريښتر په کچه ٦ اعشاريه ٦ درجې زلزلې د ايران تاريخي ښار بم ويجاړ کړى و او ٢٦ زره کسان يې وژلي ول.