د امریکا د ولسمشر ډونالد ټرمپ د دغې پرېکړې چې بیتالمقدسیې د اسراییلو د پلازمېنې په توګه په رسمیت وپېژاند، پروړاندې د عربي هېوادونو د مشرانو په ګډون د امریکا متحدینو خبرداری ورکړی چې هغه ښایي په ټول منځني ختیځ کې شخړې پراخې او د سولې بهیر لاپسې پېچلی کړي.
د فلسطیني ادارې مشر محمود عباس د ټرمپ دغه پرېکړه وغندله او و یې ویل چې متحده ایالات نور د سولې بهیر منځګړی نه دی.
د فلسطین د ازادي بخښونکي سازمان پلویو عمومي منشي صایب عریقات وویل، د ټرمپ پرېکړې د دوو دولتونو حللاره لهمنځه یووړه او د امریکا ولسمشر د سولې په پروسه کې خپل هېواد له هر ډول رول لوبولو بېبرخې کړ.
صائب عریقات
نوموړي وویل:
"د نن شپې اعلان ډېر خطرناک و، ولسمشر ټرمپ د اسراییل له پرېکړې سره چې ختیځ بیتالمقدس له ځان سره یوځای کوي، د امریکا موافقه اعلان کړه. نن شپه د امریکا د متحده ایالاتو ولسمشر خپل هېواد د سولې په پروسه کې له هر ډول رول لوبولو بېبرخې کړ. زما په عقیده هغه د اسرائیل او فلسطینیانو لپاره د دوو دولتونو حللاره لهمنځه یووړه، ځکه موږ په کراتو کراتو ویلي چې یو فلسطین به نهوي که ختیځ بیتالمقدسیې پلازمېنه نه وي."
- سعودي
سعودي عربستان چې په منځني ختیځ کې د امریکا یو مهم عربي متحد دی، د امریکا د ولسمشر ډونالد ټرمپ پرېکړه چې بیتالمقدسیې د اسرائیل د پلازمېنې په توګه په رسمیت وپېژاند، غیر مسؤلانه او د نهمنلو وړ وبلله او له واشنګټنهیې وغوښتل چې هغه بېرته واخلي.
ریاض په یوه بیان کې چې د سعودي عربستان رسمي خبري اژانس خپور کړی، ویلي چې دغه اقدام د سولې د پروسې د پر مخ بیولو لپاره په هڅو کې د ډېر شاتګ نښه ده.
- مصر او اردن
مصر او اردن ټرمپ په دغې پرېکړې سره له نړیوال قانون څخه په سرغړونه تورن کړ او د ترکیې د بهرنیو چارو وزارت هم هغه غیر مسؤلانه وبلله.
د ملګرو ملتونو عمومي منشي انتونیو ګوترش وویل، د اسراییل او فلسطینانو ترمنځ سولې ته د رسېدو لپاره له دې پرته چې یو د بل په خوا کې دوه خپلواکه دولتونه ایجاد شي، بله حللاره نهشته.
د ملګرو ملتونو عمومي منشي انتونیو ګوترش
دی وايي:
"زه دا درک کوم چې بیتالمقدس د ډېرو خلکو په زړونو کې ژور ځای لري او تل بهیې ولري. د اضطراب په دغو شېبو کې غواړم دا واضح کړم چې د اسرائیل او فلسطینانو لپاره د دوو دولتونو حللاره بل بدیل نهلري. دوهم پلان نهشته. یوازې د دوو دولتونو د ایجادولو د طرحې عملی کول دي، داسې دولتونه چې بیتالمقدس د دواړو اسرائیل او فلسطین پلازمېنه وي او په سوله، امنیت او یو د بل په رسمیت پېژندلو سره ژوند وکړي."
په پام کې ده چې د ملګرو ملتونو امنیت شورا د جمعې په ورځ په دې اړه یوه بېړنۍ غونډه راوبولي.
د بریتانیا صدراعظمې ترزا مې د ټرمپ پرېکړه په سیمه کې د راتلونکې سولې لپاره ګټوره ونهبلله.
اروپايي اتحادیې هم خبرداری ورکړ چې دغه پرېکړه به د سولې لپاره پر هڅو ناوړه اغېزې وکړي.
د اروپایي اتحادیې د بهرني سیاست مشرې فدريکا موګرېني وویل، د دواړو لورو هیلې باید پوره شي او د خبرو له لارې داسې یوه لاره باید وموندل شي چې د دوو دولتونو د راتلونکې پلازمېنې په توګه د بیتالمقدس موقف تعیین شي.
د ایران دولتي رسنیو د بهرنیو چارو وزرات له قوله ویلي چې د امریکا دغه پرېکړهیې په کلکه غندلې.
د پاکستان د بهرنیو چارو وزیر خواجه اصف د ټویټر له لارې په یوه پیغام کې د امریکا دغه اقدام د فلسطینیانو او د اسلامي نړۍ په وړاندې جبهه نیول بللي او ویلي يې دي چې دغه اقدام په تېره بیا د دوو دولتونو حللاره تر خاورو لاندې کوي.