په پېښور کې د پښتون ژغورنې غورځنګ جلسه پای ته ورسېده

پراګ ـ په پېښور کې د پښتون ژغورنې د غورځنګ جلسه چې لسګونو زرو خلکو پکې ګډون وکړ، د یکشنبې په ماښام پای ته ورسېده.

په جلسه کې د منظور پښتین په ګډون د یاد غورځنګ ګڼو مشرانو د ویناو په ترڅ کې له حکومته د پښتنو د حقونو غوښتنه وکړه.

منظور پښتین د وینا پر مهال

جلسې ته د منظور پښتین د وینا مهمې برخې:

۱. پښتون ژغورنې غورځنګ د مې پر ۲۲مه نېټه په لاهور او بیا پر ۲۹مه په سوات کې جلسه کوي.
۲. تر روژې وروسته به خلک وزیرستان ته ځي چې هلته د ناامنیو اثرات وویني.
۳. پښتانه دې سره لاسونه یو کړي او د خپلو حقونو غوښتنه دې وکړي.
۴. پښتون ژغورنې غورځنګ به د خپلو ټولو غوښتنو تر پوره کولو، مبارزې او هلو ځلو ته دوام ورکوي.

۵. اخري احتجاجي جلسه به په اسلام اباد کې کېږي.

په جلسه کې د سیاسي ګوندونو ګډون:

په جلسه کې د پښتونخوا ملي عوامي ګوند دوو مخکښانو سېنېټر عثمان کاکړ او د بلوچستان اسمبلۍ غړي عبېد الله جان بابت ویناګانې وکړې.

جلسې ته د بلوچستان نیشنل عوامي پارټۍ مخکښان هم ورغلي ول خو د نورو سیاسي ګوندونو هېڅ لوی مشر نه وو ورغلی.

د پېښور جلسه کې د مېرمنو ګډون

په لاریون کې ښځې او ماشومان هم شامل ول.

مېرمنو او ماشومانو هم په کافي تعداد کې په دې جلسه کې عملا ګډون وکړ. دوی ټول یواځې د پېښور او شاوخوا سیمو اوسیدونکي نه وو بلکې د قبایلي سیمو او بلوچستان نه هم مېرمنې او ماشومان جلسې ته ورغلي وو. دوی لیکلي شعارونه « بینرونه » پورته کړي وو چې پرې لیکل شوي وو د پښتنو ورک کړل شوي کسان دې راپیدا کړل شي.

د پېښور جلسې ګډونوال

جلسې ته د خیبر ایجنسۍ د یوې مېرمنې وینا

د پښتون ژغورنې غورځنګ جلسې ته د خیبر اېجنسۍ بسرو بي بي وینا وکړه. دې وویل، له منظور پښتینه غوښتنه کوي چې د دې د ورک خاوند د موندلو لپاره دې هلې ځلې وکړي.

پښتون ژغورنې غورځنګ جلسې ته د یوې ښځې وینا

د پښتون ژغورنې غورځنګ په ملاتړ نورې غونډې:

په داسې حال کې چې په پېښور کې د یکشنبې په ورځ د پښتون ژغورنې د غورځنګ درنه جلسه وشوه، د نړۍ د یو شمېر نورو سیمو نه هم د دوی په ملاتړ د شویو غونډو او لاریونونو راپورونه رارسېدلي دي.

په افغانستان کې په کابل او جلال اباد کې د نوموړي غورځنګ د ملاتړ لپاره غونډې وشوې چې پکې لسګونو کسانو برخه واخېسته. دوی د منظور پښتین او د هغه د ملګرو سره خپل ملاتړ ښکاره کولو.

جلال اباد کې مېرمنو هم د نارینه وو ترڅنګ په پرلت کې ګډون وکړ.

د انجینیر اباسین بهیر په نوم یو مدني فعال په جلال اباد کې د مشال راډیو خبریال ته وویل:

انجېنر اباسين بهير د دغې خېمې د پرانستې پر مهال د هغو هدفونو یادونه وکړه چې دوی د خېمې د لګولو په پار ټاکلي وو، نوموړي وويل:

((د ختیزې سيمې ولسونه هم د دغه عظیم ولس يوه برخه ده، چې جنګونو او ناخوالو دومره ځپلې چې نور نه غواړي چې د سولې غږ يې په ستونې کې خپ کړل شي، نو د افغان وطن د نورو ولسونو سره د سولې او ښېرازۍ غږ په ګډه بدرګه کوي .))

د جلال اباد پرلت

د پرلت په دې خېمه کې يو شمېر ښځينه وو هم ګډون کړی و، مقدسې احمدزۍ په په جنګ کې له ښکېلو ډلو د سولې غوښتنه وکړه:

((موږ دومره بې وسه شوي يو چې موږ له حکومته او له دښمن نه سوله په سوال غواړو. موږ هم د امن حق لرو او موږ هم حق لرو چې په ازاده فضا کې زده کړې وکړو. نورې مو مه کونډې کوئ، نورې مو مه یتیمانې کوئ.))

د جرمني کولن ښار کې اوسیدونکي افغانان

د جرمني په کولن ښار کې لسګونو پښتنو، افغانانو له پښتون ژغورنې غورځنګ سره د یووالي په موخه لاریون وکړ. په لاریون کې ښځې او ماشومان هم شامل ول.

د لاریون ګډونوالو د یوه پرېکړه لیک په خپرولو د پاکستان له حکومته غوښتنه وکړه چې د ژغورنې غورځنګ مطالبې دې ومني، د ورکو کسانو د موندلو جدي اقدامات دې وکړي، د پښتون ژغورنې غورځنګ غړو پر ضد دې د پولیسو اېف ای ارونه ختم کړي او هغوی دې نه ځورول کېږي.

د جرمني کولن ښار کې اوسیدونکي افغانان

په دې سربېره په اسټریلیا په سویډن کې اوسیدونکیو پښتنو هم د لاریونونو او غونډو په ترڅ کې د پشتون ژغورنې غورځنګ سره خپل ملاتړ ښکاره کړ.

د پښتون تحفظ غورځنګ غوښتنې

۱. په کراچۍ کې د وزیرستاني ځوان نقیب مسود د وژونکي افسر راو انوار عدالت ته وړاندې کول.

۲. له قبایلي سیمو څخه ځمکلاندې بمونه پاکول.

۳. امنیتي پوستې کمول او پر امنیتي پوستو د خلکو ځورونې بندول.

۴. ورک کسان عدالت ته وړاندې کول، بېګناهان خوشې کول.

۵. د ماورای عدالت وژنو په اړه عدالتي کمېشن جوړول.