په دې کسانو کې د قامي اسمبلۍ غړي، خسرو بختيار خبريالانو ته وويل چې دوی به له پنجابه د جنوبي ضلعو بېلولو او جدا صوبې جوړولو تحريک روان ساتي. هغه زياته کړه: ((د ترقياتي کار لپاره ورکول کېدونکو پېسو ويش منصفانه نه دی. د بېلابېلو ضلعو لپاره پېسې جلا کړل شي خو ورکول کېږي نه. په جنوبي پنجاب کې د پاکو اوبو، ورانو سړکونو، د بجلۍ نشتوالي او غربت مسلې شته دی. خو انشاالله چې کله جنوبي پنجاب ځانله صوبه شي نو تاسي به يې وګورئ چې د لاهور او فېصل اباد په شان يې جوړوو کنه! تاسي به ووينئ چې هلته به سړي سر آمدن زيات شي.))
کله چې راتلونکې اسمبليانې سوګند پورته کړي نو لومړی بايد د جنوبي پنجاب صوبې جوړولو د قرارداد منظوري ورکړي.خسرو بختيار
د حکمران مسلم لېګ (ن) څخه دغه اته غړي په داسې حال کې استعفا ورکوي چې په پاکستان کې د جولايي په مياشت کې عمومي ټاکنې کېږي. دې سره د دې ګوند د ماتېدو اندېښنې پېدا شوي دي.
خو د مسلم لېګ (ن) يو مشر غړي، آصف کرماني پرون اسلام اباد کې خبريالانو سره خبرو کې دا تشویش بې ځايه وباله او وي ويل: ((هغه کسان له ګونده وځي چې پوهېږي مسلم لېګ (ن) به يې په راتلونکو ټاکنو کې اسمبلۍ ته نه ودروي. دوی ته به د کانديد کېدو ټکټ نه ورکوي. ځيني داسې کسان دي چې خپله هيڅ حلقه نه لري. نو د دې دا مانا نه ده چې په ګوند کې څه ستونزه شته. ګوند متحد دی.))
تر دې مخکې په قامي اسمبلۍ کې د مسلم لېګ (ن) يو بل غړی، ډاکتر رمېش کمار هم له ګونده بېل او تحريک انصاف ګوند سره يو ځای شوی وو.
مسلم لېګ (ن) په پنجاب کې ډېر ښه نوم لري - توحيد
د سياسي چارو څېړونکی، اوېس توحيد وايي که د درغليوو په مقدمو کې نوازشريف ته د قېد سزا وشي کېدای شي ګوند يې مات شي خو د سياستوالو وتل دومره اثر نه لري. ((ماته داسې ښکاري چې د ایسټبليشمنټ خلاف چې نوازشريف کومې خبرې کوي، هغو خبرو په پنجاب کې پر رایه ورکونکو مثبت اغېز کړی دی. د مسلم لېګ (ن) شهرت يې نور هم زيات کړی دی. نو دا يوه مرغۍ له يوې پنجرې بلې ته تلل به د دې ګوند د خرابېدو سبب نه شي.))
د تېر مارچ په مېاشت کې مسلم لېګ (ن) ګوند پر دې سربېره چې په قامي اسمبلۍ کې يې تر بل هر ګونده زيات غړي لرل، د چېرمين او مرستيال چېرمين سيټونه وبایلل. پيپلز پارټۍ او تحريک انصاف ګوندونو د ځينو ازادو غړو سره لاس يو کړ او د يادو څوکيوو لپاره يې خپل کانديدان کامياب کړل.