د پښتون ژغورنې غورځنګ د غوښتنو په ملاتړ د دوشنبې پر ورځ په جنيوا کې د احتجاجي غونډې پر مهال له ملګرو ملتونو، اروپايي ټولنې او د بشري حقونو نړيوال سازمانونو څخه غوښتنه وشوه چې په پاکستان کې د لادرکه کسانو د خوشې کولو په لړ کې ګامونه پورته کړي.
د سويټزرلېند په جنيوا ښار کې د دوشنبې د ورځې په دې احتجاج کې د ګډون لپاره د اروپا له مختلفو ښارونو څخه په لسګونو پښتانه ورغلي ول او د ملګرو ملتونو د دفتر مخې ته يې تر څو ساعتونو پورې شعارونه ورکړل او ويناګانې يې وکړې.
احتجاجیانو په لاسونو کې د منظور پښتين، علي وزير او په کراچۍ کې په جعلي پوليس مقابله کې د وژل شوي ځوان نقيب مسود تصويرونه نيولي ول.
ګډونوالو د پښتون ژغورنې غورځنګ سمبول ګرځېدلې سرې خولۍ پرسر کړې وې، د ځينو په لاسونو کې د افغانستان بيرغونه ول او ځینو بيا سپين او تور بيرغونه رپول.
احتجاجیانو په لاسونو کې د منظور پښتين، علي وزير او په کراچۍ کې په جعلي پوليس مقابله کې د وژل شوي ځوان نقيب مسود تصويرونه نيولي ول.
د ځینو کسانو په لاسونو کې پوسټرونه ول چې ورباندې په قبايلي سيمو کې د دوی په ادعا د شويو بشري حقونو سرغړونو په اړه خبرې ليکل شوې وې.
پر دې مهال يو شمېر ويناوالو خبرې وکړې او تورونو يې و لګول چې د پاکستان پوځ د عملياتو پر مهال د ولسي وګړو ځان او مال ته زيانونه رسولي دي.
دا هغه تورونه دي چې د پاکستان پوځ تل رد کړي دي.
غونډې ته د سينديانو، بلوڅانو او د پاکستان لاندې کشمير فعالانو هم وينا وکړه.
پر دې مهال د غونډې يو منتظم فضل الرحمن اپرېدي يوه ليکلې اعلاميه واروله چې د ده په وينا وروسته به يې په رسمي توګه د ملګرو ملتونو بشري حقونو شورا ته وړاندې کوي.
فضل الرحمن اپرېدي د اعلاميې لوستلو پر مهال په ملګرو ملتونو، اروپايي ټولنې او د بشري حقونو نړيوال سازمان غږ وکړ چې په پاکستان کې له ادعا سره سم د لادرکه کسانو د موندلو او په خوندي توګه د راخلاصولو په لړ کې اقدامات وکړي.
په اعلاميه کې له ملګرو ملتونو او اړونده ادارو غوښتنه وشوه چې په پخوانۍ فاټا کې دې د ماينونو پاکولو کې مرسته وکړي.
فضل الرحمن اپرېدي په ملګرو ملتونو، اروپايي ټولنې او د بشري حقونو نړيوال سازمان غږ وکړ چې په پاکستان کې له ادعا سره سم د لادرکه کسانو د موندلو او په خوندي توګه د راخلاصولو په لړ کې اقدامات وکړي..
په اعلاميه کې په کراچۍ کې په جعلي پوليس مقابله کې د وژل شوي ځوان نقيب مسود يادونه هم شوې او غوښتنه وشوه چې نړيوال دې پر پاکستان فشار واچوي چې پوليس افسر راو انوار و نيسي او ورباندې مقدمه و چلوي.
خو دلته بايد يادونه وشي چې راو انوار وار له مخه نيول شوي او پرضد يې په عدالت کې مقدمه روانه ده.
د جنيوا دې غونډې ته د پښتون ژغورنې غورځنګ مشر منظور پښتين له پاکستانه د ټيليفون له لارې وينا وکړه.
هغه په خپله وينا کې تور و لګاوه چې په پاکستان کې د پښتون ژغورنې غورځنګ فعاله غړي نيول کېږي، زندان ته اچول کېږي او ورته د مرګ په ګډون نورې دړکې ورکول کېږي.
خو که څه هم حکومت ددې تورونو په اړه په سمدستي توګه څه نه دي ويلي البته د پښتون ژغورنې غورځنګ غوښتنې چې د جنيوا په اعلاميه کې يې هم يادونه شوې په اړه د پاکستان پوځ په پخوا کې تل دا ويلي چې دوی خلک نه دې لادرکه کړي، په پخوانۍ فاټا کې يې د ماینونو پاکولو کار پیل کړی دی او هلته يې د امنيتي پوستو شمېر کم کړی دی.
نور ولولئ
منظور پښتين د لادرکه کسانو په اړه د پښتنو، بلوڅو او سينديانو د اتحاد ږغ وکړ