د امریکا د کانګرس له خوا د فبرورۍ د اتمې نېټې دا ضرب الاجل داسې وخت را رسېږي چې دوو نویو راپورونو د امریکا د کانګرس غړي هڅولي، څو د سعودي عربستان خلاف د جمال خاشقجي د وژل کېدو له کبله د سختو اقداماتو ګواښ وکړي.
د ملګرو ملتونو ځانګړې راپور چمتو کوونکې اګنیس کالامارډ د فبرورۍ پر اوومه ترکي ته له سفره وروسته وویل، شواهد څرګندوي چې دا وژنه مخکې له مخکې پلان شوې او ورته چمتووالی نیول شوی و.
دا هم وګورئ: سي آی اې وايي، د سعودي ولي عهد د جمال خاشقجي د وژلو امر کړی ووپه امریکا کې مېشت سعودي خبريال و چې په واشنګټن پوسټ ورځپاڼه کې یې د سعودي پر مشرتابه تنقيدي لیکنې کولې.
نوموړی د تېر [۲۰۱۸م] کال په اکتوبر مياشت کې په استنبول کې د ځینو اسنادو تر لاسه کولو لپاره د سعودي عربستان قونسلګرۍ ته ننوت، خو بېرته ژوندی راونه وت.
ریاض که څه هم په پیل کې د جمال خاشقجي له نادرکۍ څخه بې خبري ښوده، خو وروسته یې ومنله چې په استنبول کې د سعودي په قونسلګرۍ کې وژل شوی دی.
خو دا لا هم نه مني چې د دې وژنې امر دې د سعودي ولیعهد محمد بن سلمان ورکړی وي.