د جمیعت علمای اسلام (ف) او عوامي نیشنل پارټۍ مشرانو یو وارې بیا د حکومت خلاف د ازادۍ مارچ د ترسره کولو هوډ تازه کړ.
مولانا فضل الرحمان او اسفندیار ولي خان په دوشنبه د چارسدې په ولي باغ کې تر ملاقات وروسته په یوه خبري غونډه کې وویل، د درغلیو په نتیجه کې اقتدار ته رسېدلی اوسنی حکومت نه مني او پرضد به یې له نورو ګوندونو سره یوځای د روانې میاشتې په ۲۷مه د پراخو مظاهرو لړۍ پیلوي.
پر دې مهال مولانا فضل الرحمان وویل، د عمران خان د حکومت د ناکامو پالیسیو له وجې له نورو هېوادونو سره د پاکستان اړیکې خرابې شوې دي.
د عوامي میشنل پارټۍ مشر اسفندیار ولي خان خبري غونډې ته د وینا پرمهال وویل، دوی د ازادۍ مارچ کې د مولانا فضل الرحمان پوره ملاتړ کوي. نوموړي وویل که حکومت د جمیعت علما اسلام ف ګوند مشران ونیول نو عوامي نیشنل ګوند به د ازادۍ مارچ واګي په خپل لاس کې واخلي.
د تحریک انصاف مشران بیا وايي، د مولانا فضل الرحمان په ګډون د اپوزیشن اکثره مشران د ۲۰۱۸ په انتخاباتو کې ناکامه شوی نو ځکه اوس د هغوی واک نه شي زغملی او مظاهرې کوي.