د روغتیا نړیوالې ادارې عمومي ریس خبرداری ورکړ چې دا ویروس اوس د نړۍ هغو برخو ته هم خپرېږي چې تر دې مهال خوندي ګڼل کېدې.
د روغتیا نړیوالې ادارې عمومي ریس تدروس ادهانوم ګبریاسوس وايي، اکثره هېوادونه د کرونا یا 'کووېډ-۱۹' ویروس د خپرېدو په لومړیو پړاوونو کې دي او په ځینو سیمو کې دا ویروس بیا په خپرېدو دی.
ده په عین حال کې هیله وښوده چې امریکا به د روغتیا له نړیوالې ادارې سره د خپلو مرستو د درولو پرېکړه بیرته واخلي.
د روغتیا نړیوال سازمان رئیس تدروس ادهانوم ګبریاسوس
د روغتیا نړیوالې ادارې عمومي ريس چې د وېډیو کنفرانس له لارې له خبریالانو سره خبرې کولې، وویل "مهتېروځئ، موږ باید اوږد مزل وکړو. دا ویروس به ډېره موده له موږ سره پاتې شي."
ډاکتر تدروس زیاته کړه، د افریقا په ځینو هیوادونو او همداراز منځنۍ او جنوبي امریکا کې د کرونا ویروس په چټکه خپرېږي چې د اندېښنې وړ ده.
ده د نړیوالو الوتنو د ژر لغوه کېدو په وړاندې خبرداری ورکړ، ویېویل باید په دې برخه کې له دقته کار واخیستل شي.
له بلېخوا د روغتیا نړیوالې ادارې یوه بل چارواکي ډاکتر مارک رایان هم د هېوادونو ترمنځ د الوتکو د تګ راتګ په وړاندې خبرداری ورکړ.
خو د روغتیا نړیوالې ادارې عمومي رئيس ډاکتر تدروس وايي، هیله لري چې د امریکا متحده ایالات به له دې ادارې سره خپلې مرستې بیا پیل کړي ځکه چې د روغتیا د نړیوالې ادارې مرستې په درسته نړۍ کې د انسانانو د ژوند لپاره خورا مهمې دي.
د امریکا ولسمشر ډونالد ټرمپ د حمل په ۲۶مه نېټه وویل چې د کرونا ویروس د خپرېدو له کبله له رامنځته شوي بحران سره په مبارزه کې د پاتې راتلو په خاطر د ملګرو ملتو د روغتیا له نړیوالې ادارې سره خپلې مرستې دروي.
د امریکا ولسمشر ډونالد ټرمپ
د امریکا ولسمشر همداراز ویلي چې دا نړیواله اداره د خپلې اصلي دندې په ترسره کولو کې ناکامه شوې ده.
ټرمپ په دې ادارې تور پورې کړ چې د کرونا د خپرېدو په مرکز یعنې د چین په ووهان ښار کې یې له حقیقته خلک خبر نهکړل.