د بلوچستان په پنجګور ضلع کې په يو وسله وال بريد کې د پاکستاني پوځ درې سرتېري وژل شوي او اته ژوبل دي.
د پوځ د عامه اړيکو څانګه (ای اېس پي ار) وايي، وسله والو د جولای ۱۴مې پر مازيګر د پنجګور په کاهان سيمه کې هغه وخت بريد وکړ چې کله پوځيانو په خپلو ګاډو کې ګزمه کوله.
بيان زياتوي چې د پېښې ټپيان د کوټي پوځي روغتون ته رسول شوي چې پکې د پېنځو حالت د اندېښنې وړ دی.
د برید ذمه واري چا نه ده منلې خو تر دې مخکې د دې ډول اکثره پېښو مسوولیت بلوڅ بېلتونپاله ډلو قبول کړی.
پنجګور د بلوچستان له مرکز کوټې څخه څه د پاسه ۵۰۰ کیلومیټره لیرې جنوب لوري ته پرته ضلع ده چې د مکران ډېوېژن برخه ده. د دې په جنوب کې د ګوادر ښار او بندر پروت دی.