د لبنان په پلازمېنه بېروت کې د اګست پر څلورمه په شویو چاودنو کې د وژلیو شمېر ۱۰۰ ته لوړ شوی دی.
د سره صلیب ادارې د اګست پر پېنځمه ویلي، ګڼ کسان لا هم د نړېدلې ودانۍ لاندې دي.
د عامې روغتیا وزیر حماد حسن رسنیوو ته ویلي چې د سمندري بندر په ګودام کې په شویو چاودنو کې ۴،۰۰۰ کسان ژوبل شوي دي.
وزیراعظم حسن دیاب ویلي چې پېښه د ۲،۷۵۰ ټنه امونییم نایټرېټ یعنې زراعتي سري د چاودېدو له وجې شوې.
Clearest video of explosion💔#لبنان #BeirutBlast #Beirut #بيروت #Lebanon pic.twitter.com/MY2hSEscUq
— Haya Noor PTI (@ImHaya__Noor) August 5, 2020
پر ټولنیزو رسنیو خپرې شوې ويډيوګانې ښيي چې په بې ساري ډول لويې چاودنې کېږي او ورپسې اور لګي.
په ویډیوګانو کې امبولانسونه ليدل کېږي چې زخميان د پېښې له ځايه هسپتالونو ته وړي.
په روغتونونو کې بېړنی حالت اعلان شوی دی. ډاکټرانو له خلکو څخه د وينې د ورکولو او له ټپي کسانو سره د نورو مرستو غوښتنه کړې ده.
د چاودنې په اړه ویډيويي رپورټ
ستاسې سېسټم د HTML5 په چلولو کې ستونزه لري.
په بیروت کې چاودنو ګڼې ودانۍ ړنګې کړي
د لبنان وزیراعظم د اګست پر پېنځمه ملي ماتم اعلان کړی او له خپلو ملګرو هېوادونو یې غوښتي چې مرسته ورسره وکړي.
"زه اوس پر خپلو ټولو ملګرو او وروڼو هېوادونو چې لبنان یې خوښ دی په بېړنۍ توګه غږ کوم چې له موږ سره ودرېږي او له لبنان سره مرسته وکړي څو خپل ژور ټپونه ټکور کړای شو."
امريکا، فرانسې، اسرايیلو او عربي هېوادونو له لبنان سره د مرستې ډاډ ورکړی دی.
چاودنو شاوخوا ودانۍ هم زیانمنې کړې
د بېروت اوسېدونکو ویلي، په ټول عمر کې یې داسې پېښه نه وه لیدلې.
د لبنان په پلازمېنه بېروت کې دا پېښه داسې مهال شوې چې ټاکل شوې د پخواني وزیراعظم رفیق حریري د وژل کېدو په اړه عدالت پرېکړه اعلان کړي.
حریري په ۲۰۰۵ز کال کې په یوه موټر بم چاودنه کې وژل شوی وو.
مقدمه پر څلورو کسانو ده چې د ایران د ملاتړ لرونکي حزب الله ډلې غړي دي.
دې ډلې د حریري په قتل کې د ککړتیا تورونه رد کړي دي.