د پاکستان هوايي چلند ادارې د بهرنيو پروازونو لپاره د هېواد د ټولو هوايي ډګرونو د بیا پرانيستو اعلان کړی دی.
ادارې د اګست پر اوومه په یوه اعلامیه کې ویلي چې نړیوال پروازونه به د روغتیا له اصولونو سره سم د اګست پر نهمه پیل شي.
د هوايي ډګر کارکوونکو ته په یو بل لیک کې د هوايي چلند ادارې ویلي چې پر ټولو هوايي ډګرونو به داخلي پروازونو ته هم اجازه وي.
د پاکستان هوايي چلند ادارې د مارچ پر ۲۵مه د کورونا وايرس وبا له کبله د هېواد دننه او بهر پروازونه په موقتي توګه بند کړي ول.