له افغانستانه د پوځیانو ایستلو په اړه د امریکا ولسمشر ډانلډ ټرمپ تر څرګندونو وروسته، ناټو وايي چې په افغانستان کې خپل ماموریت شرایطو ته په کتو پای ته رسوي.
د ناټو مشر ینز ستولتنبرګ د اکتوبر پر اتمه په برسلز کې د شمالي مقدونیې له ولسمشر ستیفو پېنداروفسکي سره په یوه ګډه خبري غونډه کې وویل، دې پوځي اتحاد پرېکړه کړې وه چې یوځای افغانستان ته ځي نو په راتلونکې کې د سرتېرو د تنظیم په اړه به هم پرېکړه په ګډه کوي او په مناسب وخت کې به یو ځای له افغانستانه سرتېري ووځي.
د اکتوبر پر اوومه امریکايي ولسمشر ټرمپ پر ټوېټر په بیان کې لیکلي ول چې غواړي د عیسویانو اختر کرېسمس پورې له افغانستانه خپل پاتې سرتېري وباسي.
We should have the small remaining number of our BRAVE Men and Women serving in Afghanistan home by Christmas!
— Donald J. Trump (@realDonaldTrump) October 7, 2020
ستولتنبرګ زیاته کړه چې ناټو اوسمهال په افغانستان کې ۱۲،۰۰۰ پوځیان لري چې د غوڅ ملاتړ ماموریت په چوکاټ کې افغان امنیتي او دفاعي سرتېري روزي.