د ایران د تر ټولو مهم اټومي ساینسپوه محسن فخريزاده وژنې، له امریکا او د هغه له نېږدې اتحادي اسرایل سره، د ایران د اړیکو د خرابېدو خطر رامنځ ته کړی دی.
محسن فخريزاده د نومبر پر ۲۷مه د ایران پلازمېنې تهران ته نېږدې په یو غلچکي برید کې وژل شوی دی.
د ایران دفاع وزیر امیر حاتمي پر محسن فخري زاده د برید په تړاو دولتي ټلوېزیون ایریب ته د نومبر د ۲۷مې په ماښام وویل: "کوم راپورونه چې د پېښې له سیمې لرو دا ښکاروي چې لومړی د هغه په موټر ډزې شوي او لس پنځلس ثانیې وروسته یو نیسان موټر چې په کې چاودیدونکي مواد ځای پر ځای شوي وو چاودنه کوي. فخري زاده په دې پېښه کې ټپي کېږي چې د همدغو ټپونو په خاطر یي وروسته ساه ورکړه."
ایران د هغه تر وژل کېدو وروسته سمدستي تور پورې کړ چې دا د اسراییلو کار دی او د هغوی په وینا د پېښې تر شا امریکا هم نېغ په نېغه یا په غیر مستقیم ډول رول لرلو.
د ایران د بهرنیو چارو وزیر محمد جواد ظریف پر ټوېټر لیکلي چې د ده په خبرو "ترهګرو د ایران یو مخکښ ساینس پوه وواژه. اروپايي ټولنه دې د ترهګرۍ دا عمل وغندي."
Terrorists murdered an eminent Iranian scientist today. This cowardice—with serious indications of Israeli role—shows desperate warmongering of perpetratorsIran calls on int%27l community—and especially EU—to end their shameful double standards & condemn this act of state terror.
— Javad Zarif (@JZarif) November 27, 2020
اسرایل او امریکا دواړو په دې اړه له څه تبصرې ډډه کړې ده.
د ایران لوی روحاني مشر ایت الله علي خامنايي پوځي سلاکار هوډ ښودلی چې د محسن فخريزاده وژنونکو ته به د تندر په څېر ګزار ورکوي.
لویدیځو استخباراتي شبکو محسن فخري زاده د ایران د اټمي پروګرامونو متفکر مغز باله او دا باور لري چې هغه د اټمي پروګرام په نوم اټمي وسلې جوړولې.