په امریکا کې د ډېسېمبر له ۱۴مې څخه د کورونا وایرس ناروغۍ واکسینو لګولو بهیر پیلېږي.
د دې لپاره په ډېره پراخه کچه هلې ځلې روانې دي چې په لسګونه میلیونه خلکو ته دا واکسیني ستنې ولګوي.
په امریکا کې د کورونا وایرس له کبله د مړو شمېر درې لکو ته نېږدې شوی دی.
د امریکا د خوړو او دواګانو څار ادارې منظوري ورکړې ده چې د فایزر او بایواینټېک کمپنیو ګډ جوړ کړی واکسین دې له ۱۶ تر ۸۵ کالو عمر لرونکو ته دوه ځله ولګول شي.
نن په کووېډ-۱۹ واکسینو بار لومړي کانټینرونه د امریکا ۱۵۴ روغتیايي مرکزونو ته رسېږي.
د دې لپاره د اتوار پر ورځ (پرون) د میشیګن د درمل جوړولو له یوې لویې کارخانې د واکسینو لارۍ د امریکا بېلابېلو ښارونو ته روانې شوې.
د فایزر کمپنۍ د واکسینونو لېږد، د امریکا په تاریخ کې د واکسینونو لېږد تر ټولو پراخ کمپاین ګڼل کېږي.
تمه ده په لومړیو کې د دغه واکسین درې میلیونه اوره (خوراک یا ډوزه) بېلابېلو سیمو ته ولېږدول شي او لومړیتوب هم روغتیايي کارکوونکو یا هم پوخ عمره کسانو ته ورکړل شي.
د کورونا وایرس واکسین د لېږدولو لپاره د بسته بندۍ پر مهال
اټکل کېږي چې په نېږدې راتلونکې کې، په ځانګړي ډول د کرېسمس او د نوي زېږیز کال د جشنونو پر مهال په کورونا وایرس یا 'کووېډ-۱۹' ناروغۍ د اخته کسانو شمېر نور هم زیات شي.
خو د کورونا وایرس ناروغۍ واکسین خبرونو، د وبا د مخنیوي لپاره خلکو ته یوه هیله ورکړې ده.
د فایزر او بایواېنټېک کمپنیو واکسین
د دغه واکسین په میلیونونو اوره (خوراکه، دوزه) د حرارت په منفي ۹۴ سینټيګرېډه درجه کې په روغتونونو او نورو مرکزونو کې ساتل کېږي.
برتانیا تېره اوونۍ وویل، لومړنی هېواد دی چې خپلو خلکو ته د فایزر او بایو اینټیک شرکتونو د واکسینو ورکول پیلوي.