د افغانستان بهرنیو چارو وزیر محمد حنیف اتمر د جنورۍ پر پنځمه په کابل کې د ملګرو ملتونو د مرستندوی ماموریت یا یوناما له مشرې سره د ملاقات پر مهال په دې هېواد کې د تاوتریخوالي پر زیاتېدو اندېښنه وښوده.
د بهرنیو چارو وزارت بېګا په یوه اعلامیه کې وویل، اتمر له دیبورا لاینز سره په کتنه کې په افغانستان کې په هراړخیز اوربند ټینګار وکړ.
UN envoy for #Afghanistan @DeborahLyonsUN today met with @MHaneefAtmar @mfa_afghanistan to discuss collective international support for peace process and overriding need for all countries to press the Taliban for a ceasefire. pic.twitter.com/VunRZMvHwE
— UNAMA News (@UNAMAnews) January 5, 2021
یوناما هم په خپل ټویټر کې لیکلي، چې مېرمن لاینز د سولې بهیر لپاره د نړیوالې ټولنې ملاتړ راخپلولو باندې یې له اتمر سره بحث وکړ، چې په دې سره پر طالبانو د اوربند منلو لپاره فشار راوړي.
طالبانو د اوربند غوښتنو باوجود په افغانستان کې خپلې جګړې کمې کړې نه دي.
دا په داسې حال کې ده چې تمه ده د جنورۍ پر شپږمه په دوحه کې د افغان حکومت د وفد او طالبانو ترمنځ د سولې خبرو دویم پړاو پیل شي چې پکې حکومتي وفد وايي، د دوی تر ټولو اولنۍ ترجیح به اوربند وي.
خو په قطر کې د طالبانو د سیاسي دفتر ویاند ډاکټر محمد نعیم د جنورۍ پر پنځمه مشال راډیو ته وویل چې لا هم د خبرو ایجنډا نه ده تیاره شوې.
د دویم پړاو دا خبرې د جنورۍ پر پنځمه پیلېدونکې وې.