په پاکستان کې د فېبرورۍ پر پنځمه له کشمیریانو سره د پیوستون ورځې په توګه لمانځل کېږي.
نن د اسلام اباد په ګډون د پاکستان په یو شمېر ښارونو کې لاریونونه ترسره کېږي چې مقصد یې له کشمیریانو سره یووالې ښودل دي.
وزیراعظم عمران خان نن د فېبروۍ پر پنځمه پر خپله ټویټر پاڼه لیکلي چې نن د دې خبرې اعاده کوي چې د پاکستان خود ارادیت د حق چې نړیواله ټولنه او سلامتي کونسل یې هم تاییدوي، له کشمیریانو سره د دوی پر قانوني حقونو ترلاسه کولو کې په پوره یووالي ولاړ دي.
On #KashmirSolidarityDay, I want to reiterate that Pakistan stands united & resolute with the Kashmiris in their legitimate struggle for self-determination, which has been reaffirmed by the international community in numerous UNSC resolutions.
— Imran Khan (@ImranKhanPTI) February 5, 2021
نن به عمران خان د کشمیر په کوټلي سیمه کې یوې ولسي غونډې ته وینا هم کوي. بلخوا پاکستان ډموکراټیک مومنټ هم نن له کشمیریانو سره د پیوستون ورځ لمانځلو لپاره د کشمیر په مظفراباد کې جلسه کوي.
کشمیر د ګاونډي هېوادونو هند او پاکستان ترمنځ لانجمنه سیمه ده چې په سر یې د دواړو ملکونو ترمنځ درې جنګونه هم شوي دي.
هند کشمیر خپل نه بیلېدونکې برخه یا (اټوټ انګ) بولي خو پاکستان وایي چې کشمیریان د دې فېصلې حق لري د کوم هېواد برخه جوړېدل غواړي.
د هند حکومت د ۲۰۱۹ز کال د اګست پر پنځمه نېټه تر خپل انتظام لاندې کشمیر ځانګړې اییني حثیت ختم کړ چې پاکستان یې سخت مخالفت کړی دی.
خو نوی ډیلي دا کورنۍ معامله بولي او پکې د پاکستان مخالفت بې ځایه ګڼي.
تېر کال د اګست پر پنځمه په پاکستان کې د هندي حکومت دغه ګام خلاف او له کشمیریانو سره د یو والي ورځ ولمانځل شوه.
د هند او پاکستان ترمنځ د کشمیر پر سر لانجه د ۱۹۴۷ز کال ګې د هند تقسیم له وخته راروانه ده.