د سېنېټ په ټاکنو کې د پاکستان جمهوري تحریک د کاندید له کامیابۍ وروستو وزیر اعظم عمران خان له پارلیمنټه د اعتماد ووټ اخیستو فیصله کړې ده.
د وزیراعظم د دې پرېکړې اعلان د بهرنیو چارو وزیر شاه محمود قریشي د مارچ پر درېیمه په اسلام اباد کې خبري غونډې ته وکړه.
نوموړي وویل چې د دې ګام موخه دا ښکاره کول دي چې په اسمبلۍ کې اکثریت له حکومت سره دی که له اپوزېشن سره.
د سېنېټ په ټاکنو کې د غیر سرکاري او غیر حتمي نتیجو له مخې د اسلام اباد نه د هغوی نوماند عبدالحفیظ شېخ د پخواني وزیراعظم او د پاکستان پیپلز ګوند له یوه مشر یوسف رضا ګیلاني نه ماتې وخوړه.
د بهرنیو چارو وزیر په دې خبري غونډه کې دا هم وویل چې پیپلز پارټۍ د سینیټ د اسلام اباد سیټ د منفي تاکتیکونو په کارولو سره ګټلی دی.
پخوانی وزیر اعظم سید یوسف رضا ګیلانی
د پاکستان پيپلز ګوند مشر بلاول بوټو زرداري، د ګیلاني ګټه د جمهوریت ګټه بللې ده. د مخالفو ګندونو اتحاد پاکستان جمهوري غورځنګ ویاند میا افتخار حسین په چارشنبه مشال راډیو ته وویل، که د وزیراعظم د باور اخېستو بهیر هم د سېنېټ د انتخاباتو غوندې په پټه ترسره شي نو د عمران خان بایلل حتمي دی.
د سېنېټ ۳۷ خالي سیټونو لپاره د مارچ پر درېیمه (پرون) ټاکنې وشوې. د دغو سیټونو د ډکولو لپاره د ۷۸ کسانو ترمنځ مقابله وه. د لومړنیو غیر سرکاري او غیر حتمي نتیجو له مخې په دغو ۳۷ سیټونو کې واکمن تحریک انصاف ګوند ۱۳ او پاکستان پیپلز پارټۍ ۸ سیټونه ګټلي دي.
دا هم وګورئ:
سېنېټ ټاکنې: د اسلام اباد پر چوکۍ د اپوزېشن امېداور رضا ګېلانی مخکې دید سېنېټ ټاکنې د پاکستان سياسي راتلونکې منظرنامه بدلولای شي؟سپریم کورټ وايي د سېنېټ انتخابات دې په پټو رایو وشيپه نورو ګوندونو کې بلوچستان عوامي پارټۍ شپږ، جمیعت علمای اسلام (ف) درې، عوامي نیشنل پارټۍ او متحده قامي مومنټ دوه دوه او بلوچستان نیشنل پارټۍ د سینېټ یو سیټ ګټلی دی.
دا ځل د سېنېټ د ۴۸ خالي سیټونو لپاره باید ټاکنې شوې وای خو دا چې د پنجاب پر ۱۱ سیټونو وار له مخې بې له مقابلې سېنټران ټاکل شوي وو، نو د مارچ درېیمې (پرونۍ) ټاکنې د ۳۷ سیټونو لپاره وې.