لاهور های کورټ د مذهب د سپکاوي په تور د دوو عیسویانو د مرګ سزا په اړه د یوه عدالت اووه کلنه پخوانۍ فیصله ختمه کړې او هغوی یې بېګناه ګرځولي دي.
دا تر هغې وروسته ده چې د اروپايي ټولنې د پارلېمان غړو پر قضیې سخت انتقاد وکړ. د شفقت اېمانوېل او شګفتې کوثر وکیل سیف الملوک د جون پر درېیمه نېټه وویل، لاهور های کورټ د دواړو د خوشې کولو امر کړی دی.
دا ښځه او مېړه په ۲۰۱۴ز کال کې یوه دوکاندار ته د اسلام د پیغمبر د سپکاوي پیغامونو د استولو په تور تر سزا کېدو وروسته بندیان شوي ول، حال دا چې دواړه لیک لوست نشي کولای.
د فرانسې خبري اژانس د سیف الملوک له خولې ویلي چې نوموړی" زښت خوشاله دی چې دا کسان خوشې شوي دي."
د ده په خبره، دا کسان د ټولنې له تر ټولو بېچاره خلکو څخه بلل کېږي او زیاتوي چې راتلونکې اوونۍ به د عدالت فیصلې تر خپرېدو وروسته خوشې شي.
د مذهب سپکاوی په پاکستان کې یوه حساسه موضوع بلل کېږي.
په اپرېل کې اروپايي پارلېمان یو پرېکړه لیک منظور کړ چې پکې پاکستان د مذهبي لږکیو په خوندیتوب کې د پاتې راتګ له وجې غندل شوی وو.