د پاکستان د کورنیو چارو وزیر شیخ رشید احمد ویلي چې پولیسو د افغان سفیر په وینا د هغه د لور د تښتونې او پر هغې د تشدد په اړه مقدمه دایره کړې.
نوموړي د جولای پر ۱۸مه په اسلام اباد کې خبري غونډې ته وویل چې افغان سفارت ورته د شپې شاوخوا دوه بجې لیکلی بیان ورکړ.
شیخ رشید وویل، د سفیر نجیب الله عليخېل لور سلسله علیخېل د جولای پر ۱۶مه له کوره پیاده ووته او بیا یې ټیکسي ونیوه او د اسلام اباد کډه مارکېټ ته ولاړه.
د نوموړي په خبره، په اسلام اباد ښار کې د څارګرو کیمرو ویډیو ښيي چې د سفیر لور تر هغې وروسته راولپېنډۍ ته ولاړله او هلته د یوه مارکېټ مخې ته لیدل شوې وه.
د پاکستان د بهرنیو چارو وزارت وايي، د سفیر نجیب الله علیخېل لور د جولای پر ۱۶مه تښتول شوې وه - د ارشیف انځور.
د کورنیو چارو وزیر وویل، پولیس نه دي خبر چې سلسله علیخېل څنګه له راولپېنډۍ څخه د اسلام اباد دامن کوه سیمې ته ورسېده خو له هغه ځایه نوموړې بل ټیکسي ونیوه او بیا د پلازمېنې اېف – نهه برخې ته ولاړله.
ده وویل، پولیسو د دوو ټیکسيانو له ډرېورانو پوښتنې کړې دي.
.@ForeignOfficePk & relevant security authorities are in close contact with Ambassador of Afghanistan & his family after the highly disturbing incident of reported abduction for several hours & assault of the Amb’s daughter. Matter is being thoroughly investigated by the Police.
— Spokesperson 🇵🇰 MoFA (@ForeignOfficePk) July 17, 2021
شیخ رشید دا څرګندونې پر داسې مهال کړې دي چې وزیراعظم عمران خان د جولای پر ۱۷مه د کورنیو چارو وزارت ته امر وکړ چې په ۴۸ ساعتونو کې دننه د سفیر د لور په تښتونه او پر هغې په تشدد کې ککړ کسان ونیسي.
پر هم هغه ورځ د پاکستان د بهرنیو چارو وزارت په یوه اعلامیه کې د سلسلې علیخېل د تښتونې خبر ورکړ.
بیان وايي، افغان سفارت ورته ویلي چې د سفیر لور د کرایې په ګاډي کې د سفر پر وخت تښتول شوې. شیخ رشید د جولای پر ۱۸مه خبریالانو ته وویل چې پولیس د دې معلومولو هڅه کوي چې سلسله علیخېل له راولپېنډۍ څخه څنګه دامن کوه ته ولاړله.
ده زیاته کړه چې د اسلام اباد په علي روغتون او بیا په پېمز روغتون کې د نوموړې درملنه شوې ده.
— Ministry of Foreign Affairs - Afghanistan 🇦🇫 (@mfa_afghanistan) July 17, 2021
افغانستان کې مظاهرې
په اسلام اباد کې د افغانستان د سفیر د لور سلسلې عليخیل تښتونې په افغانستان کې غبرګونونه پارولي او له امله یې د جولای پر ۱۸مه په افغانستان کې لاریونونه وشول.
په سلګونو ځوانانو، د پوهنتون استادانو او محصلینو، د مدني ټولنې فعالانو، د ملي شورا یو شمېر غړو او عامو خلکو په کابل کې د پاکستان د سفارت مخې ته لاریون وکړ.
دوی د یوې اعلامیې په خپرولو د عاملینو د محاکمې غوښتنه وکړه.
په دغه لاریون کې برخه اخیستونکي محمود مرهون له خوا خپره شوې اعلامیه کې ویل شوي چې باید د ملګرو ملتونو په سازمان کې د پاکستان پر وړاندې شکایت درج شي.
د افغانستان د بهرنیو چارو وزارت دریځ او غبرګونونه
اخوا د افغانستان د بهرنیو چارو وزارت د جولای په ۱۷مه نېټه په پاکستان کې د افغان ډیپلوماتانو د امنیت او خوندیتوب په اړه اندېښنه ښوولې ده.
د بهرنیو چارو وزارت له پاکستانه غوښتنه کړې چې د دې پېښې عاملین دې وپېژني او مجازات دې یې کړي.
This is an attack on Pak & the values we stand for. Hope Interior ministry immediately provides enhanced security to such soft targets. Pk is already facing instability from the fallout of escalating violence in Afghanistan,which is why Afghan-led peace is imp next door. https://t.co/LQz3S2Act4
— SenatorSherryRehman (@sherryrehman) July 17, 2021
په عین وخت کې د افغانستان د ملي شورا ښځینه غړو د پاکستان د قامي اسمبلۍ د ښځینه غړو ته یو لیک استولی دی چې پکې یې ورڅخه غوښتي چې د افغان سفیر د لور سلسلې علیخېل د تښتونې او پر هغې د تشد موضوع په پارلېمان کې یاده کړي.
دا لیک د ملي شورا استازو د جولای پر ۱۸مه استولی دی.
هلته د جولای پر ۱۷مه د افغانستان د بهرنیو چارو وزارت په کابل کې د پاکستان سفیر منصور احمد خان احضار کړ.
د ولسمشر اشرف غني دفتر، د ملي مصالحې عالي شورا، پخواني ولسمشر حامد کرزي او یو شمېر نورو شخصیتونو د سلسلې علیخېل تښتونه او ورباندې تشدد ټکان ورکوونکې پېښه بللې او په کلکه یې غندلې ده.
پاکستان کې غبرګونونه
په پاکستان کې ګڼو سیاستوالو او د بشري حقونو فعالینو د افغان سفیر د لور د تښتولو پېښه غندلې ده.
د پاکستان پیپلز ګوند غړې او سېنېټرې شيري رحمان وايي، د سفارتکارو او د هغوی د کورنیو خوندیتوب د حکومت ذمه واري وي او د افغان سفیر د لور سره دا ډول پېښه مخې ته راتلل د خواشینۍ او افسوس مقام دی.
نوموړې پر ټویټر لیکلي. "دا په پاکستان او د دغه هیواد پر اقدارو برید دی، هیله لرم چې د کورنیو چارو وزارت به په فوري ډول د داسې پېښو د مخ نیوي لپاره اقدامات وکړي."
3/3 yesterday my daughter was kidnapped from Islamabad and beaten heavily, but by Allah blessing escaped. She feels better now.This inhuman attack has been following by the concerned authorities of both countries.I express my profound gratitude for the messages of sympathy.
— Najibullah Alikhil (@NajibAlikhil) July 17, 2021
په اسلام اباد کې د افغانستان سفیر نجیب الله علیخېل د جولای پر ۱۷مه ناوخته پر ټویټر د خپلې لور له تصویر خپرولو سره لیکلي چې خلک په تېروتنه د ده د لور سلسلې علیخېلې پر ځای د بل چا عکسونه خپروي.
نوموړي لیکلي چې د افغانستان او پاکستان دواړو هیوادونو اړوند چارواکي د دې پېښې پلټنه کوي.