په پاکستان کې په بنده کوڅه کې ایسار نړیوال کرکټ په څو ورځو کې دننه یو په بل پسې لوی ټکانونه وخوړل. لومړی د سېپټمبر پر ۱۷مه نیوزيلېنډ له لوبو پر شا شو، بیا د سېپټېمبر پر ۲۰مه د انګلستان نارینه او ښځینه کرکټ ټیمونو اعلان وکړ چې دوی د امنیتي ګواښ له کبله پاکستان ته د لوبو لپاره کېدونکی سفر ځنډوي.
د انګلستان کرکټ بورډ ویلي سيمې ته د سفر په اړه اندېښنې سېوا کېږي او دا به یې پر لوبغاړو فشار نور زیات کړي چې له وړاندې ورته کرونا وبا چاپېریال ساه تنګی کړی وو.
د دوی په وینا چې د لوبغاړو او نورو چارواکو ذهنی صحت ته لومړيتوب ورکوي او ویلي چې د انګلستان کرکټ بورډ په دغه پرېکړه د پاکستان کرکټ بورډ نه بخښنه غوښتې.
د انګلستان کرکټ بورډ پرېکړې ته په غبرګون کې د پاکستان کرکټ بورډ مشر رميز راجه په خپل يوه ټويټ کې ویلي، چې دغه پرېکړې ډېر خپه کړی او زياته کړې يې ده چې د ضرورت په وخت کې انګلستان له خپلې وعدې نه پر شا شو خو زیاتوي چې پاکستان به بيرته خپل ځای ته راشي.
Disappointed with England, pulling out of their commitment & failing a member of their Cricket fraternity when it needed it most. Survive we will inshallah. A wake up call for Pak team to become the best team in the world for teams to line up to play them without making excuses.
— Ramiz Raja (@iramizraja) September 20, 2021
د پاکستان کرکټ لوبډلې پخواني کپتان سلمان بټ له مشال راډیو سره په خبرو کې د انګلستان کرکټ ډلو د سفر ځنډولو پر پرېکړه خپګان وښود او ویې ویل، د انګلستان چارواکي چې په اسلام اباد کې ګرځي هغوی ته خطره نه شته او لوبغاړو ته خطره ده؟
دی زیاتوي: "د انګلستان های کمېشن د سفر اېډوايزري ولې نه ده خپره کړې، هغه های کمېشن چې هره ورځ يې په اسلام اباد کې کمېشنر ګرځي او د مختلفو ځايونو عکسونه خپروي، کله له یوه او کله له بل سره ویني او ګپې لګوي."
ښاغلي بټ د انګلستان په دغه پرېکړه د افسوس څرګندونه کړې ده.
دا هم وګورئ: له پاکستان سره د نیوزيلېنډ کرکټ لوبې ځنډول سازش دی: شېخ رشيدبل خوا په پاکستان کې د کرکټ پوهان وايي، ولې نړیوالې کرکټ لوبډلې پاکستان ته نه راځي؟ باید چې د پاکستان حکومت پر خپلو نړیوالو پالیسیو له سره غور وکړي.
د پاکستان کرکټ یو پخواني لوبغاړي د نوم نه ښودلو په شرط مشال راډيو ته وویل:"د نیوزیلینډ کرکټ لوبډلې ځکه انکار وکړ چې دوی ته بشپړ ډول امنیت نه دی ورکړل شوی، همدا اوس د انګلستان لوبډلې هم ځکه له راتلو انکار وکړ چې هغوی اندېښنې لري. هغه هم خپه ده، د کرکټ هره لوبډله پاکستان ته د نه راتلو دلیل لري او له هم دې امله دوی منع کوي. پاکستان حکومت او کرکټ بورډ چارواکي باید د خپل راتلونکې په اړه فکر وکړي چې کوم حالات روان دي، نو زما په خیال د اسټرېلیا لوبډله به هم انکار وکړي."
ټاکل شوې وه چې د انګلستان کرکټ نارينه او ښځينه لوبډلې د اکتوبر پر ۱۱مه اسلام اباد ته سفر درلود. د انګلستان کرکټ لوبډلې د پاکستان له لوبډلې سره پر ۱۳م او ۱۴م اکتوبر په راولپنډۍ کې ۲۰-۲۰ اووريزه دوه سيالۍ تابيا شوې او د ښځينه کرکټ لوبډلې دوه ۲۰-۲۰ اووريزې او درې یو ورځنۍ سيالۍ ټاکل شوې وې.
د ښځينه کرکټ لوبډلې ۲۰-۲۰ اووریزې سيالۍ هم پر ۱۳م او ۱۴م اکتوبر په راولپنډۍ او بيا درې يو ورځنۍ سیالۍ په ۱۷، ۱۹، او ۲۱م اکتوبر هم په راولپنډۍ کې ټاکل شوې وې.
د نیوزيلېنډ کرکټ لوبډلې هم پر ۱۷م سېپټېمبر په داسې حال کې د پاکستان سفر ځنډولی وو چې په دغه ورځ هم په راولپنډۍ کې مېلمه لوبډلې له کوربه لوبډلې سره سيالي کوله، او د سيالۍ تر پیلېدو لږه شېبه وړاندې نيوزيلېنډ د سفر ځنډولو اعلان کړی وو.
پاکستان د نیوزيلېنډ په دغه پرېکړه هم خپګان ښودلی وو خو نيوزيلېنډ ویلي ول د خپلو لوبغاړو ژوند يې ډېر مهم دی.