په اروپايي هېوادونو کې د کووېډ-۱۹ ناروغۍ له بیا زیاتېدو سره یو شمېر هېوادونه بیا محدودیتونه لګولو ته اړ شوي دي.
په اروپايي هېوادونو کې د خلکو د واکسینېدو نسبتاً ښه بهیر او د صحت ښه نظامونو باوجود د اکتوبر له پیله په اروپا کې په یوه اوونۍ کې دننه د کورونا وایرس د وړجنو کسانو شمېر په زیاتېدو دی.
د کېسونو د شمېرو کچه په داسې حال کې ده چې د وبا له پیل راهیسې تر اوسه نه ده لېدل شوی.
په تېرو اووه ورځو کې په اروپا کې تر ۲۱ لاکه زیات کېسونه رجسټر شوي چې د تېر کال د نومبر د لومړۍ اوونې ریکارډ ماتوي.
تر ټولو زیات کېسونه په برتانیا، جرمني، روس، ترکي او اوکراین کې ریکارډ شوي دي چې د ټولو کېسونو تر ۵۰ فیصده زیات پکې رجسټر شوي دي.
په عین حال کې د کسانو د مړینې شمېر هم زیات شوی دی.
د روغتیا نړیوال سازمان وايي، د مړینې کچه تېره اوونۍ تر ۱۰ فیصده زیاته شوې ده.
د نیدرلینډ حکومت د نومبر پر ۱۲مه د دریو اوونیو لپاره نیمه ټولبند اعلان کړ.