د پاکستان وزيراعظم عمران خان ويلي دي چې د ده ګوند پاکستان تحريک انصاف په خيبر پښتونخوا کې د بلدياتي انتخاباتو په لومړي پړاو کې تېروتنې وکړې او د هغه تاوان يې وليد.
نوموړي نن (ډېسېمبر ۲۱مه) پر خپله ټويټر پاڼه زياته کړې چې د ناسمو نوماندانو انتخاب د دې بنسټيز لامل و.
تحریک انصاف نےپختونخوا بلدیاتی انتخابات کےپہلےمرحلے میں غلطیاں کیں اورخمیازہ بھگتا۔غلط امیدواروں کاانتخاب ایک کلیدی سبب تھا۔اب سےمیں KP کےدوسرے مرحلےسمیت ملک بھرمیں بلدیاتی انتخابات کےحوالےسے تحریکی حکمت عملی کی بذات خودنگرانی کرونگا۔تحریک انصاف مزیدقوت کیساتھ ابھرے گی،انشاءاللہ۔
— Imran Khan (@ImranKhanPTI) December 21, 2021
د ډېسېمبر پر ۱۹مه د خیبر پښتونخوا په ۱۷ ضلعو کې بلدیاتي انتخابات وشول چې د غېر حتمي او غېر سرکاري نتيجو له مخې جمعيت علما اسلام فضل الرحمان ډلې په صوبه کې د تحصيلونو پر کچ تر ټولو زياتې څوکۍ ګټلې دي.
د خيبر پښتونخوا په ۱۸ ضلعو کې به د بلدياتي انتخاباتو دوهم پړاو د ۲۰۲۲ز کال د جنورۍ پر ۱۶مه تر سره کېږي.
وزيراعظم عمران خان ويلي چې له دې وروسته به د خيبر پښتونخوا د بلدياتي انتخاباتو د دوهم پړاو په ګډون په ټول هېواد کې د پاکستان تحريک انصاف لخوا د بلدياتي انتخاباتو د سټراټيجي څارنه پخپله کوي. هغه زياته کړې چې ګوند به يې په لا زيات قوت سره راپورته کېږي.
د پاکستان تحريک انصاف شاته پاتې والي لاملونه:
د پاکستان تحريک انصاف ګوند يو مخکښ او د خيبر پښتونخوا اسمبلۍ مرستیال سپیکر محمود جان د ډېسېمبر پر ۲۰مه په پېښور کې خبريالانو ته وويل چې د دوی د خپل ګوند د صوبايي اسمبلۍ او قومي اسمبلۍ د غړو لخوا د ازادو یا نورو ګوندونو له کاندېدانو سره د مرستې په وجه دوی په بلدیاتی انتخاباتو کې له ماتې سره مخامخ شول.
"زما د خپلې حلقې د قومي اسمبلۍ غړي نور عالم خان د جمعيت علما اسلام ف د کانديد په ډاګه مرسته کوله، او زما د حلقې نېږدې د صوبايي اسمبلۍ غړي ارباب وسیم حیات د ازاد امیدوار مرسته کوله، نو چا له چې بېټ عزت ورکړی دی، هغوي د خپل ګوند مرسته ونکړه."
د کرکټ بېټ د پاکستان تحريک انصاف ګوند انتخاباتي نښه ده. د محمود جان د ادعا په غبرګون کې تر اوسه د پورته ذکر شويو قومي او صوبايي اسمبلۍ د غړيو دريځ مخې ته نه دی راغلی.
د پاکستان مسلم ليګ ن ګوند مشر او په قومي اسمبلۍ کې د حزب اختلاف مشر شهباز شريف بيا وايي چې ولس ځکه پاکستان تحريک انصاف رد کړ چې د ده په وينا ولس د ګرانۍ، لوړو نرخونو او خرابې حکومتدارۍ له کبله هغوی ته په غصه دی.
The people of KP have rejected the PTI. The ruling party%27s defeat is an expression of people%27s anger over the back-breaking inflation, crushing price hike & the meltdown of governance. It is the beginning of the end of an experiment that has cost the nation dearly.
— Shehbaz Sharif (@CMShehbaz) December 21, 2021
د خيبر پښتونخوا په بلدیاتي انتخاباتو کې د پاکستان تحریک انصاف د شاتې پاتې والي په اړه خبريال او شنونکی محمود جان بابر وايي چې په دې انتخاباتو کې تحریک انصاف د یو سیاسي ګوند بڼه نه لرل او هر سړي د ځان لپاره هلې ځلې کولې.
"وړاندې به چې دوی په انتخاباتو کې برخه اخيستله نو د عمران خان د جنون په نوم به یو جوش او جذبه وه او د ګوند ټول خلک به له خپل مشر سره ولاړ ول. بله خبره د ټکټونو د وېشلو ده چې سمو کانديدانو ته ټکټونه نه وو ورکړل شوي. بل دا چې د حزب اختلاف ګوندونو به چې له تحریک انصاف سره د [رياستي] ادارو د ملاتړ کوم تورونه لګول نو په دې انتخاباتو کې له پاکستان تحریک انصاف سره د هغو ادارو ملاتړ ښکاره نه شو."
غېر حتمي او غېرسرکاري نتيجې:
د خيبر پښتونخوا د لومړي پړاو د بلدياتي انتخاباتو د غېر سرکاري او غېر حتمي نتيجو له مخې جمعيت علما اسلام ف پر ۱۶ تحصيلونو، واکمن ګوند پاکستان تحريک انصاف پر ۱۰، عوامي نېشنل ګوند پر شپږ، پاکستان مسلم ليګ نواز پر درو او جماعت اسلامي پر دوو تحصيلونو کاميابي ترلاسه کړې ده.
د دې تر څنګ اته ازاد نوماندان هم بريالي شوي دي.
په دې ضلعو کې ټول ۶۶ تحصیلونه دي خو د ډېره اسماعيل خان او بنو په بکاخيل تحصيلونو کې د بدامنۍ پېښو له کبله انتخابات وځنډول شول.
د رايو شمېرنې دوام:
د ځینو تحصیلونو غېرحتمي او غېرسرکاري نتیجې لا هم نه دې خپرې شوې. د پاکستان د انتخاباتو کمېشن وايي، د بلدیاتي انتخاباتو د رایو شمېرل روان دي.
دا هم وګورئ: خیبر پښتونخوا بلدیاتي ټاکنې: یوه ګوند هم اکثریت نه دی ترلاسه کړید انتخاباتو کمېشن وياند سهېل احمد د ډېسېمبر پر ۲۰مه مشال راډيو ته وويل چې ټاکنې ښې ترسره شوې او د رايو شمېرل به هم په شفافه توګه وشي.
د نوموړي په وينا په دې ۱۷ ضلعو کې یو شمېر سیمې داسې دي چې د رایو اچوونکو شمېر پکې د نورو پرتله لږ دی نو ځکه یې د حتمي پایلو راتک ژر ممکن دی خو د لویو حلقو د رایو شمېرنه ښايي وخت واخلي.
د سياسي ګوندونو نيوکې:
پاکستان پيپلز ګوند او عوامي نېشنل ګوند په خپلو بيانونو کې د انتخاباتو د نتيجو په اعلان کې پر ځنډ نيوکې کړې دي.
خو د انتخاباتي کميشن چارواکي وايي په بلدیاتي انتخاباتو کې د ووټونو شپږ پرچې دي نو ځکه پکې د رایو اچولو پرمهال هم وخت لګېدلی او د شمېرلو عمل یې هم ګران دی.
د خيبرپښتونخوا په ۱۷ ضلعو کې پر ۹،۲۲۳ پولينګ مرکزونو کې ولس د کليو او ضلعو پر کچ د نوماندانو د انتخاب لپاره رایې واچولې.
انتخاباتو کې د ناامنۍ پېښې:
دې ټاکنو ته ۳۵،۷۰۰ کسانو ځانونه نوماند کړي ول. د امنيت لپاره د پوليسو او ايف سي ځواکونه ۷،۷۰۰ سرتيري ګمارل شوي ول.
پر دې مهال په یو شمېر سیمو کې د تاوتریخوالي پېښې هم رامنځ ته شوې چې له کبله یې په ځینو سیمو کې ټاکنې تر بیا ځنډول شوې دي.
په کرک او کوهاټ کې د وسله والو په ډزو او باجوړ کې د چاودنې له امله په مجموعي توګه لږ تر لږه پينځه کسان ووژل شول.